Aizawl, Jylliew 28: Hynniew ngut ki dkhot ba dang shu shah jied shen ka Chakma Autonomous District Council ki la shim smai ha kane ka sngi Nyngkong ba la lah ha Kamalanagar, Mizoram.
Kine ki hynniew ngut ki MDC ki ba la shim smai ki kynthup ia u Durjya Dhan Chakma, MDC ka 5-Kamalanagar ‘N’ Constituency, Mohan Chakma, MDC ka 20-Parva Constituency, Kusum Lota Chakma, MDC ka 2-Borapansury Constituency, Ajoy Kumar Chakma, MDC ka 8-Udalthana Constituency, Anil Kanti Chakma, MDC ka 4-Bajeisora Constituency, Uday Tongchangya, MDC ka 12-Mainabapsora Constituency bad u Sanjeev Chakma, MDC ka 7-Kamalanagar-W Constituency.
Na ka liang u Dr. Manesia Khaimeichho, MCS, SDO(C), Chawngte u ba la shah pynkup bor ha u Deputy Commissioner, Lawngtlai u la iashim bynta ha ka ba pyntian smai ia kine ki MDC.
Ha ba kren ha kane ka sngi, u Dg. Buddha Lila Chakma, CEM, CADC u la pynbna ia u Dg. Durjya Dhan Chakma kum u Deputy Chief Executive Member da ka ba pynshong nongrim ruh halor ka jingdonkam ia u deputy na ka bynta ban pynthikna halor ka jingdon ia ka discipline ha ka jingsynshar.
U la pynkynmaw ruh kumno ba ha kine ki por ki ba la leit noh ka jingbym don ia u Dy CEM, ka ophis ka la hap noh ha ka jingkhmih jong ki ba bun tylli ki kti hadien ba u CEM u dang don ha ka jingleit tour bad ka ba hateng hateng ka lah ruh ban wanrah ia ka jingshim rai ka ba bakla.
Hadien kane ka jingialang pyntian smai, baroh ki dkhot jong kane ka EC ka ba thymmai ki la pynlong ka jingleit jurip ia ki lynti surok ka Mamalanagar ki ba la sniew bad shah pynjulot namar ka jingther jong u ‘lapbah ha kine ki khyndiat taiew ba la dep.
Na ka liang u CEM u la ong ba shen kin shna pynbha noh ia kane ka surok ha kine ki khyndiat sngi ki ban wan.
