Guwahati, Nailur 02 : Shi sngi hadien ka jingshah pynpra jong kawei ka skul Madrassa hapoh Bongaigaon district ka Assam, kawei na ki party liang pyrshah ba kongsan ha Assam ka AIUDF ha ryngkat u nongialam ba hakhliehduh jong ka, u Maulana Badaruddin Ajmal kila byrthen ban ujor pyrshah ia ka sorkar shapoh ka iingbishar, kata hadien ba u la pynlong ka jingleit jurip ia katei ka Madrassa hynnin ka sngi Palei.
Ka AIUDF ka lah ban leit ujor sha ka iingbishar Supreme Court halor kane ka jingshah pynpra jong ka skul Madrassa.Kem ia ki lada ki dei ki lehnoh jihadi, pynshitom ia ki da ka jingiap hynrei balei ban pynpra ia ka skul. “Ngin pynlong ka jingleit iakynduh ia u Myntri Rangbah (CM) ka Assam, bad lada donkam ngin leit sha ka iingbishar SC,” ong u Ajmal.
Hynrei, na ka liang u CM ka Assam, u Himanta Biswa Sarma ula ong kam don kano kano ka jingthmu kaba long pyrshah ia ki Madrassa. “Ka jingthmu ba kongsan ka long ban iohi ba ia kine ki Madrassa ym dei ban pyndonkam na ka bynta ki jingtreikam jong ki kynhun seng lehnoh jihadi.Ngi la ioh ia ki jingtip kiba bniah halor ka jingpyndonkam bakla ha ka kyrteng ki Madrassa, ia katei ka jaka la pyndonkam na ka bynta kiwei pat ki jingthmu,” ong u Sarma sha ki lad pathai khubor hynnin ka sngi Palei.
Na ka liang ki bor pyniaid district ka Bongaigaon kila pynjari da ki kyndon section 144 of CrPC hapoh ka district naduh hynnin ka sngi Palei.
Ha kawei pat ka bynta, sa uwei pat u dkhot ka kynhun seng lehnoh al-Qaeda in the Indian subcontinent (AQIS) na Assam.Ia u Ajmal Hussain 39 snem rta uba dei na Raghunath Path kaba hapoh Fatasil Ambari, Guwahati ula shah kem noh ha ki bor pulit ka Goalpara ha ryngkat ka jingiatreilang bad ki pulit ka Guwahati ha kane ka step sngi Balang ba la lah.La kem noh ia u Hussain halor ka jingiadei bad ka Matia PS Case No: 105/22 u/s 121/121(A)/120(B) IPC RW section 18/18(B)/19/20 UA(P) Act.
Ia ka jingphla ka jong u bad jong uwei pat u dkhot uba la shah kem kham hashwa, u Abdus Subhan 43 snem rta ha kaba ula phla ba u dei u dkhot jong ka kynhun AQIS bad ABT.U Hussain ula pdiang ruh halor ka jingai jaka rieh na ka bynta ki lehnoh jihadi na Bangladesh ha ka jaka shong ka jong u ha Guwahati bad ioh pdiang ruh ia ki jinghikai lyngba ki dkhot ka AQIS ha Barpeta, kane ka long katkum ki tyllong khubor pulit.
