Shillong, Nohprah 28 : Ka All Saints’ Cathedral kala kyntu ia ka Sorkar Jylla ba ka dei ban leh eiei pyr shah ia ki briew kiba donkti ha ka jingjia ba dangshen ha kawei ka Iingmane Khristan ha shnong Mawlynnong, East Khasi Hills District.
Ha ka jingpynlait khubor, u Bishop Purely Lyngdoh u la ong, “(Ngi) sngewsih shibun ia kaei kaba la leh ha ka Iingmane ha Mawlynnong, bad ngi pynrem jur ia kane. Kane ka la jia ha ka por ba ki Iingmane bad ki jaka Mane Blei ki Khristan ha kiba bun ki jaka ha ka Ri kila mad ia kum kine ki kam pynthut ha ka jingmane Blei bad ki prokram, da ki dkhot jong ki kynhun Hindu”.
U la ong ba kawei ka Seng Hindu ha Assam ka la byrngem ia ka Durbar trai ri kaba peit ia ka ‘Krem Mawjymbuin’, lada ym shah ban leh Puja hangtei. Ka i kumba kine ki kam ki dei kiba don ka jingiasoh mynta ha kylleng ka Ri ban pynjur ia kum kine ki kam bad ki rukom leh.
“Kaei kaei kaba la pynlong ia kito ki briew ban leh ia kaei kaba ki la leh hapoh ka Iingmane ha Mawlynnong ka long kaba bakla shibun. Ka lah ban long kaba la pyrkhat lypa, ban pyni ia ka jingleh pyrshah bad jingbym khein snep ia ki Riewlum jong ka thain bad ia ka jingngeit niam jong ki,” ong u Bishop haba bynrap ” Ngi kyntu ia ka Sorkar Jylla bad ki bor treikam jong ka ban pynngat ia kito ki briew kiba la leh ia kum kine ki kam, bad kan pynsangeh ia ka jingpynjakhlia hadien habud ia kino kino ki Jaka Mane Blei.”
