Shillong, Lber 11: Watla ka seng BJP kala dep ban pyniasoi iaka jingiatehkular (Agreement) hapdeng ki ar ngut ki MLA ba kin ia shimti mar ar snem shiteng iaka shuki myntri, hynrei u Myntri sorkar u Bah Alexander Laloo Hek ula ong, ki nongialam kiba ha khliehduh jong ka BJP kim don jingtip eiei ia katei ka jingbthah iatehkular.
Dang shen u Bah AL Hek bad u Bah Sanbor Shullai kila ia soi iaka jingtehkular ban ia shimti mar ar snem shiteng ia ka shuki myntri bad ia katei ka jingiatehkular la dep ruh ban aiti ha u Myntri Rangbah ka jylla u Conrad K Sangma.
“U President ula pynshai ia ngi ba la phah da ki High Command jong ka seng BJP ban iasoi iaka jingiatehkular, hynrei nga la ioh pdiang pat ia kawei ka jingthoh na ka High Command ba kim tip eiei ia kata ka jingbthah mar ban ia long myntri mar ar snem shiteng. Ka seng kala ai beit tang iaka kyrteng jong nga ban bam smai kum u myntri sorkar” ong u Bah AL Hek.
U la ong, namar ba ki nongialam kiba hakhliehduh jong ka BJP kim shym la bthah eiei ban ia shim mar snem shiteng iaka shuki myntri, kumta yn burom beit iaka jingbthah jong ki nongialam jong ka BJP kiba na Delhi.
Katba u Bah Sanbor Shullai pat ula pynskhem da kaba ong, “Ha u snem 2018 kala don ka jingiapynbeit tang da ka ktien, hynrei mynta ka kynti ki nongialam kiba hakhliehduh jong ka seng, kila bthah ba dei ban shu iasoi noh da ka jingiatehkular ban ia shim mar ar snem shiteng ia ka shuki myntri sorkar”.
Ula ong, hadien ba la dep ban iasoi ia ka jingiateh kular, la aiti kopi ia ka jingiatehkular sha u Myntri Rangbah ka jylla, u National President ka BJP u JP Nadda, u National General Secretary u Ritiraj Sinha bad sha u nongialam ka BJP uba khmih iaka Meghalaya u Chauba Ao.
