Agartala, Lber 11: Ki dkhot kiba dang shah jied thymmai sha ka iingdorbar assembly ka Tripura kin shim smai na ka bynta ka jingshimti kam hapoh ka conference room jong ka assembly ha ka 16 tarik mynta u bnai.Ia ka jingpyntian smai yn pyndep da u Lamphang ba shipor u Binoy Bhusan Das.
Ha ka 24 tarik mynta u bnai kane ka assembly kaba dang thaw thymmai ka jylla kan sdang ia ka jingialang dorbar kaba nyngkong.Ia kane ka dorbar yn pyniaid da u Lat ka jylla u Satyadeo Narain Arya katkum ki kyndon Section 174(1) jong ki riti synshar ri ne Constitution jong ka ri India, pyntip u secretary ka state assembly lyngba ka jingthoh.
Da ka jingdon jong ki nongialam na ki sawtylli ki party sain hima, kaba kynthup ia ka BJP, CPI(M), Congress, bad ka TIPRA Motha ka assembly ka jylla kan ioh mad ia ka jinglong kaba thymmai ha kane ka kynti kaba mynta.
Na ka liang u Secretary ka legislative assembly ka jylla u la pynmih ia ka jingpyntip kaba kyrpad ia baroh ki dkhot kiba la shah jied sha ka iingdorbar assembly ba kin wan sha katei ka jingialang pyntian smai ha ka 16 tarik mynta u bnai ha ryngkat ki syrnot ilekshon ne ki election certificates.
Watla na ka liang ka CPI(M) kan ym don ha ka liang pyrshah ha kane ka kynti kaba mynta, hynrei ka party riewlum ka TIPRA Motha ka lah ban long la kloi ban pyniasoh ha ka miej jong ka liang pyrshah ha ka sien kaba nyngkong ha ka histori jong ka Tripura. Watla katta ka dang don ka jingpyrshang ban kynthup ia arngut ki myntri na ka seng TIPRA Motha hapoh ka kynhun myntri sorkar.
Watla ka TIPRA kam shym la pynmih ia ka kyrteng jong u nongialam liang pyrshah jong ki, hynrei la antad ba u MLA ka TIPRA Motha u Animesh Debbarma un shimti kum u nongialam liang pyrshah hapoh ka iingdorbar thaw ain.
