Shillong, Lber 10: Ka tnat Sports & Youth Affairs ka Jylla hynne ka sngi thohdieng, kala pynlong daka Road Show naduh Madan Heh Mawlai Phudmuri sha Madan Iewrynghep Laitumkhrah kum shi bynta ban pdiang burom iaka kynhun ialehkai Footbal ka jylla.
Ki Nongiashimbynta kila iaid lyngba ka Jaiaw Jingthangbriew, Jaiaw St. Joseph, Jaiaw Langsning, Jaiaw Pdeng, Mawkhar Main Road, Motphran, Khyndai Lad, AG Office, Additional Secretariat, Barik, Malki Point, Dhanketi, Don Bosco Square, Laitumkhrah Beat House bad pynkut ha Madan Iewrynghep.
Ia kane ka tnat Sports & Youth Affairs kala leh naka bynta ki rangialehkai bad ia ki Coach ka kynhun ialehkai phutbol ka Meghalaya Football Association hadien ba ka la jam ha ka sien kaba nyngkong shaduh ka phainal jong ka lympung ialehkai phutbol ba heh tam hapoh ka ri India ka 76th National Football Championship Hero Santosh Trophy 2022-23 kaba la long ha Riyadh Saudi Arabia.
Ha kane ka jingpynkup burom, ki rangialehkai ki la ioh mar T.20 hajar ryngkat bad ka Meghalaya Football Association ka la ioh ia ka song pisa kaba T.28, 91,216 bad ia kane ka song pisa la sam da u bah Shakliar Warjri u Myntri ka tnat ialehkai ka sorkar jylla.
Haba kren ha kane ka sngi bah Shakliar u la ai khublei kyrpang ia ka kynhun Meghalaya ha kaba ki lah ban wanrah ia ka burom kaba khraw da kaba poi sha ka Final jong ka Santosh Trophy, kaba kim pat ju poi koit bad kaba la thaw history na ka jingioh rung semi bad final ba nyngkong.
U bah Shakliar ula pynpaw ruh ba ki la don ia ka jingpyrkhat ban kyntiew ia ki kam ialehkai bad ban sdang ban ai ia ki scholarship kiba pher bapher ia ki khun samla kiba don sap ha ka kam ialehkai.
“Lada ngi kwah kyntiew ia ki kam ialehkai, ngi donkam ia ki jingtei ne stadium bapher bapher, kiba ki la pynbit pynbiang na ka bynta ki khun samla bad ia ki jingtei kiba dang tei ngi la buh thong ban pyndep hapoh u bnai Nohprah, mynta u snem,” ong u bah Shakliar.
U bah Shakliar ula iathuh ruh ba u sngewthuh bha ba ka kynhun Meghalaya ka poi shaduh ka final lyngba bun ki jingeh bad u kyrmen ba ha kawei ka por, ym ban wan baar hynrei ban iohrah syndon ia ka trophy.
Ha kane ka sngi la don lang u Director ka tnat Sports & Youth Affairs u Vibhor Aggarwal IAS, u Director ka tnat I&PR u Malthus S Sangma (MCS), ki dkhot jong ka Meghalaya State Olympic Association, nangta ki dkhot jong ka MFA bad kiwei kiwei ki synjuk ialehkai ha ka jylla, ki kmie ki kpa ki player bad ki paidbah.
