Shillong, Lber 11: U Myntri ka sorkar jylla u Bah Shakliar Warjri uba na ka sneg HSPDP ula iathuh ba ula dep iasoi da ka Agreement ne jingiatehkular bad u Bah Methodius Dkhar naka bynta ban ia shim mar ar snem shiteng iaka shuki myntri.
“Kala don ka jingiapynbeit hapoh ka seng ban ia shim mar ar snem shiteng iaka shuki myntri sorkar. Ngi lah ia soi iaka jingiatehkular hynrei kaba kham kongsan ban iaka jingiateh kular kadei ka jingiateh hapdeng jong ngi ki para MLA bad ka jingburom iwei ia iwei” ong u Bah Shakliar.
U Bah Shakliar ula ong, namar ba kala don ka jingiakren bad ka jingpynbeit hapoh ka seng, kumta kin iaid beit kumba la pynbeit hapoh ka seng HSPDP.
Kumba long mynta hapoh ka sorkar MDA-II, na ka seng BJP ia ka shuki Myntri la shimti shwa mynta da u Bah AL Hek bad hadien ba la dap ar snem shiteng yn sa ailad sa ia u Bah Sanbor Shullai ban shimti ia ka kam myntri, katba na ka seng HSPDP la shimti shwa ia ka kam myntri da u Bah Shakliar Warjri bad hadien yn sa ailad ia u Bah Methodius ban shong haka shuki myntri.
Ha kaba iadei bad kitei ki jingiapynbeit bad jingiatehkular, na ka liang u Myntri Rangbah ka jylla u Conrad K Sangma ula kubur ba kala don ka jingiapynbeit hapdeng ki MLA ka BJP bad HSPDP na ka bynta ban ia shimti mar 2 snem shiteng ia ka shuki Myntri Sorkar.
U Conrad ula iathuh ba ula ioh pdiang iaka shithi bad kala don ruh ka jingiakren hakhmat jong u ha kaba iadei bad ka jingthmu ban ia shim ia ka kam myntri mar ar snem shiteng ha ka seng BJP.
“Ha kaba iadei bad ka seng HSPDP, ngam pat ioh ia kano kano ka jingthoh, hynrei kala don pat ka jingiakren ha kaba kila mynjur ban ia shong iaka shuki myntri mar 2 snem shiteng bad ha katei ka jingiakren la ia donlang kitei baroh ngut ki MLA” la ong u Conrad.
