Kokrajhar, Nailur 16: Ka Bhutan kala shim ia ka rai ban plie biang ia ki khyrdop jong ka ha ka thain khappud na ka bynta ki nongwan shangkai pyrthei naduh ka 23 tarik mynta u bnai, kata ha ha ka sien kaba nyngkong naduh ka jingsaphriang jong ka jingpang Covid-19.Kine ki khyrdop ki dei kiba don hapoh Samdrup Jhongkhar bad Gelephu.
Ka kynhun ki nongmihkhmat na Bhutan hapoh ka jingialam jong u Tashi Penjore uba dei u Director (law & order) jong ka tnat Ministry of Home and Cultural Affairs jong katei ka ri Himalaya kila pynlong ia ka jingialang bad ki heh sorkar ka Bodoland Territorial Council (BTC) ha Kokrajhar ha ka sngi Balang ba la lah ban iamir jingmut halor kane ka phang.
U Penjore ula ong ba ia kine ki khyrdop yn sa plie biang hadien ar snem shiteng ba la khang ia ki namar ka jingsaphriang jong ka jingpang Covid-19.
“Hadien ba ka jinglong jingman na ka jingpang Covid-19 kala kham biang, kumta ruh na ka liang ka sorkar Bhutan kala pynbna halor ka jingplie biang ia kine ki khyrdop ha ki thain khappud jong ka na ka bynta ki kam khaii pateng, ki kam jngohkai bad halor kiwei pat ki jingtreikam naduh ka 23 tarik mynta u bnai,” ong u Penjore.
“Mynta lah ar snem shiteng, kiba bun ki heh sorkar na baroh arliang kila kylla lut bad ngim shym la lah ban iakynduh bad ban tei pat ia ka jingiadei lyngba ka jingiakynduh kaba markhmat kaba long kaba kongsan bha hapdeng ki nongshong shnong ha ki thain khappud jong kine ki artylli ki ri.Ngi khmih shakhmat na ka jingwan ka jingiadei lyngba ka jingiarung ia mih,” ong shuh shuh utei u heh sorkar ka Bhutan.
Ha kajuh ka por ula kyntu ruh ia ki nong shangkai pyrthei ba kin wan jngoh ia ki jaka jngohkai bapher bapher ka Bhutan hadin ba kila wan rung sha kane ka ri lyngba ka khyrdop na Gelephu bad na Samdrup Jongkhar.
“Kham hashwa ngi la shah ban rung tang lyngba ka Phuentsholing bad Paro hynrei mynta ngi la thaw sa laitylli kiwei pat ki jaka rung na ka bynta ki nongwan shangkai pyrthei,” ong shuh shuh u Penjore.
Na ka liang ka sorkar Bhutan ka don ruh ia ka jingthmu ban kyntiew ia ki kam jngohkai lyngba ki jaka kiba itynnad kiba la pynlong hi da ka mariang, ki jaka ba don ki sim ki doh kiba itynnad na ka bynta ki nongwan shangkai pyrthei.
Shuh shuh une u heh sorkar u buh ruh ka jingkyrpad ia ki nongwan shangkai pyrthei ba kin wanrah ruh ia ki voter ID card lem bad kiwei pat ki kot ki sla haba ki wan ban rung sha kane ka ri Himalaya.
Nalor ki heh sorkar ka BTC, ki deputy commissioner bad ki superintendent of police ka Kokrajhar, Chirang, Baksa bad Udalguri district ruh kila ia don lang ha katei ka jingialang bala pynlong ha BTC Secretariat ha Kokrajhar.
