Dibrugarh, Iaiong 23: U Amritpal Singh, uba dei u heh jong ka Waris Punjab De bad uba dei u Member of Parliament na Khadoor Sahib, u la shah rah ha ki Pulit jong ka Punjab ha ka sngi Palei hadien ba la kut ka por ba la set phatok ïa u katkum ka aiñ National Security Act (NSA).
Ka kynhun ki pulit na Punjab ki la kem ia u na Dibrugarh Central Jail ha kaba iadei bad ka case jong ka jingshah thombor jong ka Ajnala police station ha u snem 2023. Ka jingshah set jong u ha ka NSA kaba lai snem ka la kut ha ka por shiteng miet jong ka 22 tarik u Iaiong.
Hadien kane, la rah noh ïa u Singh sha Dibrugarh Police Station na ka bynta ka remand baa r sngi, hapdeng ka jingpahara kaba jur bha. Ka kynhun kali convoy kiba don 11 tylli kaba kynthup ia ki pulit ka Punjab, ki pulit ka Assam, bad ki commando ki la synran ia u.
Ia kane ka operation la ialam da u Deputy Superintendent of Police na Punjab, ha kaba u Additional SP (Crime) ka Dibrugarh u Atul Kumar u la peit ia kane ka jingpynkynriah ia u.
Kane ka remand baa r sngi kan ailad ia ki nongtohkit ban kylli jingkylli ia u Singh halor ka jingkynnoh ba u don bynta ha ka jingjia ha Ajnala, ha kaba ki kynhun runar ki la hiar thma ia kawei ka thanat (police station) ban pynthikna ia ka jingpyllait ia u paralok jong u, ha kaba la pynlong ia ki bun ngut ki pulit ban mynsaw.
Haba pynshisha ïa kane ka jingjia, u nongïasaid aiñ jong u Singh ka Jasbir Kaur u la ong ba yn sa tohkit ïa u ha Dibrugarh Police Station bad nangta yn pynphai biang ïa u sha Dibrugarh Central Jail.
“Un sa shah tohkit da ka kynhun ki Pulit ka Punjab ha kaba ïadei bad ka case ha Ajnala bad hadien yn rah biang ïa u sha phatok,” ka la ong bad bynrap ba ïa ka jingbishar yn pynlong lyngba ka video conferencing na Punjab.
Kane ka jingjia ka long hadien ka hukum ba dang shen jong ka Punjab bad Haryana High Court, kaba la ailad ïa ki Pulit ka Punjab ban kem ïa u Singh hadien ba la kut ka por ba u shah set phatok ha ka NSA katba ki dang bthah ba un dang bteng ban shah set ha Dibrugarh namar ka jingsngewkhia ha ka liang ka aiñ bad ka suk ka saiñ.
U Singh u la set ha ka phatok Dibrugarh Central Jail hapdeng ka jingpahara kaba jur bha naduh u bnai Iaiong 2023. Katba katto katne ngut ki paralok jong u ki la shah pynkynriah biang sha Punjab hadien ba ka jingshah set jong ki ha ka NSA ka la kut, u Singh u dang long u nongshah kynnoh ba kongsan ha kaba iadei bad ka case ha Ajnala. Une u briew u mad ïa ki jingshah kynnoh ba bun jait katkum ka aiñ Indian Penal Code, kynthup ïa ka jingthmu ban pynïap briew, ban thombor ïa ki nongtrei sorkar, bad ka jingthmu ban leh be-ijot.
La jer kyrteng ruh ïa u ha kumba shi dorjon tylli ki ejahar ha kylleng ka jylla Punjab kiba ïadei bad ki kam thombor bad pyntieng pynsmiej, bad dang shen la pynrung kyrteng ïa u kum u nongthaw buit ha ka jingpynïap ïa u Gurpreet Singh, uba don ha ka social media ha u bnai Risaw 2024.
Watla u don hapoh police custody, hynrei u Singh u la ïakhun bad jop ïa ka shuki Khadoor Sahib Lok Sabha kum u kyrtong shimet ha ka general elekshon ha u 2024. La ai parole ia u ha u bnai Naitung jong u snem 2024 ban bam smai kum u MP hynrei u dang sah ha phatok naduh katei ka por.
.){kind=link}