Guwahati, Lber 23 : Uwei u Nongtrei ka Indian Air Force ula shah kem na Chabua Air Force Station ha Dibrugarh District ka Assam halor ka jingkynnoh ba u syntiat badai ia ki jingtip ba kongsan ha ki kam iada ri sha Pakistan, ong ki Heh shipai.
Ka Chabua Air Force Station ka dei kaba kongsan bha na ki ktem ka Indian Air Force ha ki bynta lam mihngi ka Ri, kaba don ruh ia ka bynta ba kongsan ban iada ia ka thain Shatei Lam Mihngi ka ri bad ki jaka hakjat u lum makashang.
Kane ka jingkem, bala leh da ka jingiakhynra lang hapdeng ki bor syntiat ka Rajathan bad ki shipai Air Force, kala pyni pyrthei ia kaei kaba ki nongtohkit ki ngeit ba ka dei ka kam sopsop jong ka kynhun kaba don jingiadei bad ka Pakistan.
Kat kum ka jingiathuh ki heh, kane ka case ka dei kaba la iaid naduh u Kyllalyngkot 2026 haba ki bor syntiat ka Rajasthan kila ioh kem ia uwei u briew ba kyrteng u Jhabara Ram na Jaisalmer. Ha ka jingtohkit, u Ram ula phla ba u ju iatreilang bad ju iakren man ka por bad uwei u briew na ka tnad Syntiat ka Pakistan, kaba ialam ka kynhun tohkit sha u Sumit Kumar.
U Sumit Kumar (36), uba dei na Prayagraj ha Uttar Pradesh, ula trei kum u Multi Tasking Staff (MTS) hapoh ka Air Force Station ha Chabua.
Ki kynhun tohkit ki kynnoh ba ula pyndonkam ia ka kyrdan jong u ban ioh ia ki jingtip ba buhrieh jong ki shipai bad ula ai pat ia kine sha ki briew ka Pakistan lyngba ki rynsan social media.
Ia u Kumar la ialam noh sha Jaipur ban nang tohkit shuh shuh. “Une u briew ula don jingiadei bad ki bor syntiar ka Pakistan naduh u snem 2023 bad u ju ai ia ki jingtip kiba kongsan da ka jingsiew pisa” ong ki heh shipai.
