Guwahati, Lber 21: Hadien ka jingpynkynriah ia ki sawngut ki dkhot ka kynhun kieng atiar ‘Waris Punjab De’ kaba kyrshan na ka bynta ka jinglaitluid ka Khalistan shapoh ka phatok Central Jail ha Dibrugarh, na ka liang u Inspector General of Police (Law and Order) ka Assam u Prashanta Kumar Bhuyan hynnin ka sngi Nyngkong u la her sha Dibrugarh na ka bynta ban pynlong ia ka jingialang ba kongsan halor ki kam shongshngain.
Nalor kata u Bhuyan u la bishar bniah ruh ha kaba iadei bad ka jingpahara hapoh Dibrugarh Central Jail bad hukum ruh ia ki bor khmih phatok ba ki dei ban pynkhlain ia ka jingpahara hapoh bad shabar jong ka phatok kumjuh.
Kitei ki sawngut kiba la shah kynnoh donkti ki la shah kem noh ha Punjab bad la wallam noh ia ki ha kane ka jylla ka thain shatei lammihngi (Northeast) da ki pulit ka Punjab ha ka 19 tarik mynta u bnai ha kaba la set noh ia ki hapoh ka Central Jail ha Dibrugarh.
Ia kine ki sawngut kiba la shah set la tip kyrteng kum u Daljeet Kalsi, Basant Singh, Gurmeet Singh Bhukhanwala bad u Bhagwant Singh ia uba la tip ruh kum u Pradhan Mantri Bajeke.Kine ki la shah pynngat hapoh ki kyndon jong ka National Security Act (NSA) bad mynta ki don hapoh Central Jail ha Dibrugarh.
Mynta sa hynniew ngut kiwei pat ki dkhot jong katei ka kynhun kieng atiar Khalistan bad ki paralok ba iajan jong u Amritpal Singh ki lah ban shah pynkynriah noh sha Dibrugarh, Assam ha kine ki 24 kynta ki ban wan.
Na ka liang u Deputy Commissioner ka Dibrugarh, u Biswajit Pegu hynnin ka sngi Nyngkong u la ong; “Ngi la ioh jingtip ba sa hynniew ngut ki dkhot ka kynhun kieng atiar Waris Punjab De yn pynkynriah sha Dibrugarh mynta lane lashai ka sngi.Mynta ki la don lypa sawngut ki dkhot jong katei ka kynhun kiba la pynkynriah sha Dibrugarh bad don mynta hapoh Dibrugarh Central Jail.Ngi la pynjur ia ka jingpahara hapoh bad shabar jong ka pahtok.La pynkhlain shuh shuh ia ka jingpahara lyngba ki pulit ka Assam bad na ka tnat pahara Central Armed Police Force (CAPF).
Ki tyllong khubor ki iathuh ba ia u Harjeet Singh u ba dei u mama jong u nongialam ka kynhun “Waris Punjab De” u Amritpal Singh yn pynkynriah noh sha Dibrugarh ha ryngkat kiwei pat ki dkhot jong katei ka kynhun.
