Dibrugarh, Jylliew 25: Ka Chaulkhowa Jama Masjid, kaba la 128 snem ba don ha Dibrugarh, kala shah pynpra noh ha ki bor pyniaid district na ka bynta ban pynheh ia ka surok four lane bad ban pynbha ia ki nala ban tehlakam ia ka jingshlei um ha sor.
Na ka liang ki ophisar kila pynpaw ba jingpynpra kala wan hadien ba la dep ban leh ia ki jingdonkam baroh ha kaba iadei bad ki jaka puta.
“Katkum ka jingshim jaka, yn sa siew bai lut ksan sha ka kynhun ba shah ktah. Kane ka jingpynpra ia ka shi bynta jong ka mosque la leh na ka bynta ban shna pynheh ia ka surok four-lane,” ong u wei na ki ophisar ka district.
Kane ka project ka kynthup naduh ka jingshna bha ia ki nala naduh na Bokul shaduh sha ka jingkieng Sessa kaba dei ka thain kaba ju shlei um bha ha ka por slap.
Kum shi bynta ban pynpra, ki bor pyniaid district kila pyndonkam da ki puh shilum ban pynpra ia ki bynta jong ka jingtei jong ka mosque.
“Na ka liang ki paidbah nong shong shnong kila ia ai lang ka jingiatrei lang ryngkat namar ba ki sngewthuh ba ka jingpynheh ia ka surok ka long ba donkam ban weng ia ka jingeh jong ka dheng kali bad kumjuh ruh na ka jingshlei um” la ong u ophisar.
