Guwahati, Naiwieng 28 : Hadien ka jingiakren bad ki nongialam ka Jaidbynriew Kuki bad ki seng jong ki, haduh 700 ngut ki paid Kuki-Zo kiba shong riehtngen ha Karbi Anglong naduh u snem bala lah, la phah leit phai noh shala Jylla.
U Chief Executive Member (CEM) ka Karbi Anglong Autonomous Council (KAAC) Tuliram Ronghang ha ka sngi Balang ula ong ba ka Council kala siew ia ka bai lut baisep ha ka leit ka wai jong kine ki phetwir bad la phah leit phai ia ki da ki bos ha ryngkat ki bor pahara.
U Ronghang ula ong ba dang don sa kumba 1000 ngut ki paid Kuki-Zo kynthup ia 400 tylli ki Longiing, ki dang riehtngen ha Singhasan Hilla bad ka thain Borjan. Ula ong ba ka Council kala ialeh kat kaba lah ban iarap ia ki ba kin lah leit phai biang shala ka jong ka jaka.
“Ngin ym kyndang ia ki da ka bor, hynrei ngin iarap ba kin leit phai hadien ka jingiakren bad ki seng bapher bapher kynthup ki jaidbynriew Kuki” ong u Ronghang.
Ula ong “Ka Council kan nym ailad ban ioh long trai halor ka khyndew ka shyiap ia ki briew ba wan poi wir nabar khamtam kito kiba wan na Manipur hadien ba khie ka kam iaumsnam” ula ong.
