Guwahati, Naitung 1: Ka sorkar Assam ha ka sngi Nyngkong kala pynbna paidbah ia ka jingpyrkhing ban khang lad ia ka jingkynnoh pyndonkam bakla ia ka Aadhaar cards da ki briew kiba shu wan rung be-ain.
Na ka liang u Myntri Rangbah ka jylla Assam u Himanta Biswa Sarma, u la ong ba ka jylla shen kan sa pyntreikam ia ki bor pyniaid district ba kin don kti lang ha kaba iadei bad ka jingai Aadhaar cards sha ki rangbah ban khanglad ia ka jingpynrung tuh ia ki kyrteng.
“Ka por ka la kut na ka bynta ki Aadhaar thok ha Assam!” ong u Sarma haba u thoh ha ka X. “Ngin pynlong ïa ka rukom treikam ba pyrkhing bha ban pynthikna ban ym don u nongwan rung tuh uba pynskhem ïa ka kot be-aiñ bad pynthut ïa ka jingïatylli jong ka ri.”
Kane ka rai kala wan hadien ba la mih ka jingsngewkhia ba jur, halor ka jingkiew ka jingpyndonkam ia ka Aadhaar cards ba thok ban ioh ia ki lad jingiarap na ki scheme bapher bapher, kum ha ka ioh kam ioh jam, ka jingpynrung kyrteng ban ioh ia ka EPIC thep vote, ha kaba ki heh ophisar kila pynpaw ba kane ka buh jingma ia ka ri bad kumjuh ruh ka jingbun briew ba kynsan kynsan.
“Ka jylla Assam kan dei ka jylla ba nyngkong eh ka ban ai ia ki Aadhaar na ka bynta ki briew kiba la rangbah hapoh ka jingpeit bniah jong ki district magistrates ka ban long pyrkhing bha.Kane ka sienjam la khmih lynti ba kan pynkhlain shuh shuh ia ka jingpyntikna ne ka jingpyn shisha khamtam eh ha ki thain khappud,” la ong u Samra.
