Guwahati, Nailar 29: Ka United Nations Committee on Elimination of Racial Discrimination (CERD) ka la kyntu ïa ka India ban bishar bniah ne weng noh ïa ka Armed Forces (Special Powers) Act (AFSPA), da kaba ong ba ki kyndon jong ka ki lah ban khanglad ïa ka jingkitkhlieh halor ki jingkynnoh ba la pynkheiñ ïa ka hok longbriew manbriew.
Ia kine ki jingai jingmut la ai hadien ba ka CERD ka la bishar bniah ia ka India’s periodic report hapoh ka International Convention on the Elimination of All Forms of Racial Discrimination kaba la long ha Geneva 11 bad 12 tarik u Nailar. Ka committee ka la pynmih ia ka jingpynkut jong ka ha ka 25 tarik u Nailar.
Ka CERD ka la pynpaw ïa ka jingsngewkhia halor ka jingdonkam ban ïoh ïa ka jingmynjur shwa na ka Sorkar Pdeng shwa ba ki bor pahara kin shah pynngat ha ki kyndon aiñ katkum ka AFSPA, da kaba ong ba kane ka kyndon ka buh ïa ka jingkhanglad kaba khraw ban ïoh ïa ka hok bad ka lah ban ïarap ban ym shah pynshitom.
Ka la kynthoh ruh ia katei ka ain kaba la ai ia ki bor kiba heh, kynthup ia ka jingtalasi, kem bad set khlem hukum, bad kumjuh ruh ia ki bor kiba heh ban pyndonkam da ka bor.
Ka committee ka la pynkynmaw biang ia ka jingai jingmut jong ka kaba kham mynshwa naduh u snem 2007, da kaba kdew sha ka Jeevan Reddy Committee, bad ka la khot ia ka India ban bujli noh ia ka AFSPA da ki ain kiba kham long briew man briew bad kiba iahap bad ki kyndon jong ka pyrthei jong ka hok longbriew manbriew.
Ka CERD ka la pynpaw ruh ïa ka jingsngewkhia halor ki khubor kiba ïadei bad ki jingkren ba ïashun, ki kam pynïashrut bad ki jingthombor jaitbynriew kiba thmu ïa ki Dalit, ki Scheduled Tribes, ki Scheduled Castes, ki phetwir Rohingya bad ki Muslim kiba kren Bengali.
Hynrei ka India ka la iada ia ka riti synshar bad ka jinglong ba bun jait jong ka ha khmat ka committee Ka kynhun na India, ba la ïalam da u Solicitor General Tushar Mehta, la batai bniah ruh ïa ka jubab jong ka sorkar halor ka jingia um snam hapdeng ki ar jaidbynriew ha Manipur kaba la sdang ha u bnai Jymmang 2023.
U Mehta u la ong ba ki lanot ki dei na baroh ar tylli ki jaitbynriew bad ba la ai jingiarap bad pynbha khlem da khein bein.Katkum ki jingai jingmut jong u, ka sorkar ka la pynlut haduh 8.2 klur tyngka haduh u snem 2024-25, ka la shna 7,000 tylli ki iing bad pynkynriah jaka haduh 16,500 ngut ki briew na ki 3,700 tylli ki longiing haduh u bnai Lber 2026.
Shuh shuh u la ong ba ïa ki case kiba ïadei bad ka jingshah lehbeiñ ha ka liang ka jingshongkha shongman la tohkit da ka Special Investigation Teams ba la khlieh da ki ophisar na shabar ka Jylla Manipur.
Ka Ministry of External Affairs ka la kyntait ïa ki jingbishar ba pynkut jong ka CERD, da kaba batai ba ki jingkdew shaphang ka India ki dei kiba don jingthmu ha ka saiñ hima sima.Ka sorkar ka pynskhem ba ka AFSPA ka dang donkam ha ki jaka ba la pynbna ba la pynthut namar ki daw jong ka jingshngain.
