Shillong, Nailar 29 : Uwei u Ophisar ka Enforcement Directorate uba shah jer kyrteng kham hashuwa ha ka jingkynnoh bam pisa ha Kerela, ula ngat mynta sa ha ka jingshah kynnoh thymmai ha Meghalaya, ha kaba uwei u briew uba shah khot hajir ban kylli jingkylli, ula kynnoh pynban ba u shah shoh ha ka por ba shim jingthoh ia ki jingbatai jong u.
Ia ka jingujor la aiti ha u Nongmynsong Police Station ha Shillong da u Advocate Niksrang Ch. Marak na ka bynta u Sansilstone Sangma. Kat kum ka jingujor, u Sangma ula leit mih hakhmat ka ED ha ka 27 tarik Nailar hadien ba ioh pdiang ia ka shithi khot hajir ban shim jingthoh ia ki jingbatai ia ka case ba pynngat pyrshah ia u.
U Sangma ula kynnoh ba une u Ophisar ba kyrteng u Shekar Kumar, ula ktah kti ia u ha ka por kylli jingkylli. Une u nong ujor ula pyntip ba ula ai ka jingiatreilang bad ka jingtohkit bad um shym la ialeh pyrshah ne pynthut ia ka jingtohkit ha ka por ba jia kane ka jingshah ktah kti.
Hadien kane ka jingshah ktah kti, u Sangma ula pyntip ba ula shitom, ka tyrpeng bad ka kti jong u kila ot bad jngem snam. La pynkit noh mar mar ia u sha Civil Hospital Shillong ban phah khmih ha ki doktor. Ia ka medical record la suh lang bad ka jingujor bala aiti sha ki Pulit.
Ka jingdawa ba hakhmat eh ha ka jingujor ka long ban sumar ia ki video CCTV na ka Ophis ka ED. U nongmudui ula kyntu ia ki Pulit ba kin leit shimti noh mardor ia ki recording, ki server data bad ki video na ka kamra tohkit, ka lynti iaid bad ka jaka ryng hashuwa ban pynduh pyndam, ne pynjulor ia kine ki sakhi.
U nongiasaid ain ula dawa ban leh ia ka jingpynithuh bad bishar ia baroh ki Ophisar bad ki briew kiba iadonlang ha ka kamra ha ka por ba pynlong ia ka jingtohkit. Nalor kane, ula kyrpad ia ka jingtohkit kaba khuid, ban sumar ia ki sakhi electronics, lum ia ki medical record bad tohkit ia une u Ophisar ED bad kiwei ki sakhi.
Kane ka jingkynnoh kala mih hapdeng ka jingpaw ka kyrteng u Kumar ha kawei pat ka kam bam pisa ha Kerela.
Ha u 2025, ka Kerela Vigilance and Anti-Corruption Bureau kala jer kyrteng ia u Kumar, uba shakri ha katei ka por bad ka ED Kochi Unit, ha ka case ba kynnoh dawa pisa haduh T.2 klur ban pynsangeh ia ka jingtohkit ED pyrshah ia uwei u nong khaii.
Ha ka jingtohot, uwei na kiba shah kynnoh la ioh kem pynlein ba u dang pdiang ia ka song pisa ba T. 2 lak, kaba lam shuh shuh sha ka jingkem ia ki briew bad ka jingbishar bniah ia kane ka kam bam pisa.
