Guwahati, Iaiong 21 : U Khliehduh ka All India United Democratic Front (AIUDF) Badruddin Ajmal, ha ka sngi saitjain ula ther tyngeh ia u Myntri Rangbah ka Assam Himanta Biswa Sarma bad kob ba un sa plie biang ia 700 tylli ki madrassa thymmai ynda ula long MP hadien ba jop ia ka elekshon Lok Sabha.
Haba kren ha ka rynsan ialap elekshon ha Nagaon, uneu Khlieh ka AIUDF ula ong ba ki MP ka AIUDF na Karimganj bad Nagaon ha Assam “Kin plie ia 700 tylli ki madrassa ba thymmai hadien ka elekshon Lok Sabha, thoh ha ka diary jong phi, u Badruddin Ajmal ula wan sha Parliament”.
Ka Sorkar Assam ba ialam da ka BJP bad Himanta Biswa Sarma, kala khang dam ia bun tylli ki madrassa ha Assam.
U Ajmal ula iashimbynta ha ka jingialang elekshon ban pan jingkyrshan ia u kyrtong ka AIUDF Aminul Islam, uba iakhun na Nagaon.
Ha kajuh ka por, u Badruddin ula ther tyngeh ruh ia u nongialam ka Congress Pradyut Bordoloi bad ong ia u ba u dei u riewshukor. Ula ong ba “U Bordoloi ula aikam hynrei ym don uwei ruh u muslim ban iohkam ha kine ki san snem. Ula pynduh ia ka hok ki muslim bad leh kiar ia ki. Wat u ‘Modi’ lane Himanta Biswa Sarma kin shym la lah ban aikam”.
U Ajmal ula buh jingkylli ia u Bordoloi halor kaei kaba ula leh ia ki paid Muslim ha kine ki san snem bala leit noh.
