Dibrugarh, Jylliew 1: Ka wah Brahmaputra kala sdang ban pyni ia ki dak ki shin jong ka jingma ha Dibrugarh ha ka sngi u Blei hadien ka jingther u slap bah ba jur da ki sngi, kaba la mih ka jingsngewkhia namar ka jingshlei um ha kylleng ki district. Ki ophisar ka tnad Water Resources kila pyntip ba ka jingtuid jong ka wah ka long 105.85 metres bad 15 centimetres shalor jong ka jingma kaba long 105.70 metres.
Ki don kumba 35 tylli ki shnong ha kylleng jong ka District kila shah ktah na ka jingkiew kynsan jong ka um ha kaba 10,00 ngut ki nong shong shnong kila hap ban kynriah ne shah ktah, katkum ka jingiathuh ki bor pyniaid district.
Ka jingther u slap baheh kala pynlong ia ka wah ban da ka bor sha ki bynta jong ka upper Assam, bad ka jinglong jingman jong ka suin bneng lyngba ka jingkhein la iathuh ba u slap ba jur un dang iai bteng ha kine ki sngi ban wan ha baroh ar tylli ki thain bad kumjuh ruh sha ki jaka lum jong ka Arunachal Pradesh bad kane ka jinglong jingman ka lah ban dang pynkiew shuh shuh ka um.
Ka Dibrugarh kala mad khatduh ia ka jingma na ka Wah Brahmaputra kadei ha u snem 1998, ha kaba ka um kala poi ne kiew haduh 106.48 metres. “Ka jingkiew jong ka um, ka long shisha kaba sngewkhia bad ngi dang buddien bha ha kaba iadei bad ka jinglong jingman,” la ong u wei u ophisar ka Water Resources Department ha ka sngi u Blei.
Da ka jingtieng ia ki jingtwa jong ka wah bad ka jingtwa jong ki rud wah bad ki khyndew ka la nang kiew, ka bor pyniaid district kila pynmih ia ka jingmaham bad kyntu ia ki paidbah kiba don harud wah ban long kiba husiar. “Ngi don ha ka por ba sdang jong ka por shlei um, bad ki jinglong jingman ki lah ban nang sniew shuh shuh,” la maham uwei u heh jong ka district.
Ban kham pynsuk ia ki paidbah ban kloi ka jingioh jingiarap, ki bor pyniaid district kila buh da ki number phone 9435358371, landlines u number 0373-2312940 ne 0373-2450100, bad u toll-free number, 1077, ba kin pyntip lada don kano kano ka jingjia.
Shuh shuh la pyntip ba ka wah Brahmaputra kala kiew bha (water level). Ha Naharkatia, ka jingkiew jong ka um ka long 118.58 metres, kaba la jan poi sha ka jingma kaba 120.40 metres. Ha Khowang, ka jingkiew jong ka um ka long 101.43 metres, kaba duna tang khyndiat ban poi sha u lain ne u dak jong ka jingma ba 102.11 metres.
Na ka liang ki bor pyniaid district kila kyntu ia baroh ki paidbah ba kin long kiba husiar bad phikir bha bad ruh ban long kiba la pynkhreh na ka bynta ban kynriah lada u slap u dang iai bteng ban ther ha kane ka thain.
