Guwahati, Nailur 20 : Ki jaka pule shimet (private institutes) hapoh Assam naduh mynta kin ym lah shuh ban kyntiew ia ka bai skul, bai klas bad kiwei pat hala ka jong ka mon ha kaba kin hap ban ioh ia ka jingmynjur na ka sorkar jylla na ka bynta kane.
Ia kane ka sienjam la shim da ka sorkar Assam hadien ba kila mih shibun ki jingujor lyngba ki jaka pule shimet namar ka jingkyntiew ia ka bai skul, bai klas bad kiwei pat ki tnat pule/aijinghikai khlem kano kano ka jingpyntip.
Ka sorkar Assam kala shim ia kane ka sienjam khnang ba kan pynsting ia ki longiing longsem kiba la lah ban khyllie pat halor ki jingduh bad ka jinghiar ha ka ioh ka kot hadien ka jingsaphriang jong ka jingpang Covid.
Ki katto katne ki jaka pule shimet khnang ba kin khyllie pat ia ki jingduh nong lyngba kine ki ar snem ba la dep namar ka jingsyllad jong ka jingpang Covid ia ka ri hi baroh kawei kila sdang ban kyntiew ia ki bai skul, bai klas bad kiwei pat kaba la pynkhih bitar shibun ia ki khynnah pule bad kaba la pynlong ruh ia ki katto katne ba kin phah daka jingujor pyrshah ia kane ka jingleh jong kine ki jaka pule shimet.
Na ka liang ka sorkar Assam kala wan shakhmat ban ai ka jingkyrshan na ka bynta ki khynnah bad samla pule da kaba pynmih ia ka jingmaham pyrshah ia kine ki jaka pule shimet kiba la pynkylla kam kamai lyngba ka pule puthi.
Katkum ki khubor la ong ba naduh mynta ki jaka pule shimet lada ki kwah ban kyntiew ia ka bai skul, bai klas bad kiwei pat kin hap ban iasyllok bad ka ‘Fee Regulatory Committee’ bala thung da ka sorkar jylla na ka bynta ban bishar bniah halor kiba kum kitei ki jingjia hapoh ki jaka pule shimet khnang ba kine ki jaka pule kin ym lah ban lehbor ia ki khynnah bad samla pule lyngba ka jingkyntiew ia ka bai skul, bai klas bad kiwei pat ki tnat pule.
Mynta kine ki jaka pule shimet hapoh Assam kin hap ban pyntip ha kaba iadei bad ki jingsiew jong ki khynnah na ka snem sha ka snem bad kin hap ban phah ruh ia ka kaiphot sha ka ‘Fee Regulatory Committee’ hashwa ba kin pyntreikam ia ka rai kaba iadei bad ki jingsiew.
Lada na ka liang ka Committee kan sakhi ba kane ka jingpynkhreh ha kaba iadei bad ki jingsiew ka la long kaba palat na ka bynta ki longiing longsem jong ki khynnah pule, ka don ia ka bor ban pynkylla ia ka da kaba punduna ia ka jingsiew.
