Guwahati, Jylliew 18: Kawei ka jingkieng kaba dang shu dep ban maramot thymmai, kaba don ha ki bynta jong ka Silchar-Kalain, kaba hap hapoh ka Cachar District, Assam ha ka step sngi Balang kala kdiah noh.
Ka daw jong ka jingpra kane ka jingkieng ba dang shu dep maramot thymmai la iathuh ba ka dei na ka jingkit palat pud jong ki trok kit maw.
Kane ka jingjia kala jia ha ka por 1:30 jong ka step phyrngap ka step sngi Balang, ha kaba ar tylli ki trok kila ngam sha ka wah Harang ha ka por ba kane ka jingkieng kala dkut.
Kine ki trok kila pynkhein ia ka jingbthah ban kit katkum ka jingkhia ba la buh bad kane kala mih ka jingsngewkhia halor ka jingbym trei kam jong ki pulit ba talasi kaba don marjan.
“Ka jingkhia ba la shah ia ki trok ban kit na kane ka jingkieng ka long 40 ton, hynrei ki trok ki kit haduh 120-130 ton u maw,” la ong ka Farida Parvin Laskar, kaba dei ka dkhot jong ka Zila Parishad. “Ki kali ki hap ban iaid lyngba ki lai tylli ki jaka ba ki pulit ki talasi ne chechpoint bad kawei ka don tang kuba 50 metre na ka jingkieng. Mano ba shah ia ki ban iaid lyngba? Bad balei ki bor pyniaid district ki sngap man man halor kane bad ia kine ki jingkylli dei ban ioh ia ka jubab.”
Hadien ka jingkhyllem noh jong ka jingkieng, u District Magistrate ka Cachar u Mridul Yadav bad u Superintendent of Police u Numal Mahatta kila wan ban jngoh ia kane ha ryngkat bad ki wei de ki heh ophisar.
“Kila ki don ki jingpyrkhing ha kane ka jaka, bad la buh saw tylli ki jaka talasi ban buddien ïa kum kine ki jingpynkheiñ aiñ. Hynrei watla katta ruh, kane ka jingjia ka la jia,” ong u Yadav. “Ngi la bthah ban pynlong ka jingtohkit bad ka jingialeh ban pynlait mynta ka dang iaid shakhmat.”
