Guwahati, Risaw 28: Ki Pulit jong ka Cachar kila ioh ban kem noh ia u wei u briew uba pyniaid beain ia kawei ka jaka ai jingsumar ia kaba la tip kum ka’Baby Health Care’ kaba hap hapoh jong ka Sonai police station, Assam.
Ia une u briew la tip kyrteng kum u Dr. Rajul Hoque Laskar (38) snem ka rta uba dei na ka shnong Nagdirgram part-4.
“Ngi la kurup lut ia ki kot ki sla kiba donkam bad ngi la sdang ia ka jingleh katkum ka ain,” la ong uwei u heh pulit.
Ki pulit ka Cachar ki la sdang ia ka jingkhynra kaba jur pyrshah ia ki doktor jakoid bad haduh mynta la ioh ban kem haduh 15 ngut ki doktor jakoid ne ki Doctor thok.
Dang shen, uwei u doktor jakoid u la shah kem na ka thaiñ Silchar halor ka jingkynnoh ba u pynïaid ïa kawei fake medical degree thok kaba heh tam ha Barak Valley.
Une u nongshah kynnoh u dei uba la tip kyrteng kum u Jayanta Prashad Das uba la tip da kiba bun kum u “Dr JP Das.” La kynnoh ba u la thok ia ki briew da ki snem da kaba leh kum u doktor bad ai ia ki kot sumar thok sha kiwei pat.
