Guwahati, Nailar 16 : Ki Pulit ka Guwahati bad Sivasagar kila ioh kem ia u Anurag Chaliha uba la phet rieh halor ka jingsuba donkti bad ka jingdhat jubor ka Nongialam ka BJP Kisan Morcha Indrani Tahbildar iala ka jingim.
Ia u Chaliha la kem na Demow ha ka miet sngi nyngkong lyngba ka jingkhynra jong kine ki Pulit ka Assam. U kurim jong kane ka heh BJP ula ujor da ka ejahar pyrshah ia u Anurag Chaliha halor ka jingkynnoh donkti bad kane ka jingiap ka kurim jong u.
U kurim ka Indrani, u Ritesh Tahbildar ula ujor ia ka mukotduma ba kynnoh beit beit ia u Chaliha ha Chandmari Police Station kat kum ki kyndon 120 (B)/306/384 IPC.
Ki Pulit kila iathuh ba ka Indrani kala dkhat iala ka jingim da kaba dih palat pud ia u dawai pynioh thiah ha ka miet 11 tarik Nailar. Ia kane ka jingjia la lap ha ka janmiet ba bud por 5:30 baje.
Kat kum ka khubor, ka Indrani kala dkhat iala ka jingim ha ka 11 tarik Nailar, hadien ka jingsaphriang ki dur ba ialeh ieid bad u Dkhot ka BP Kisan Morcha na Golaghat District ha ki social media.
Ki Pulit hadien kila shem ba ka Indrani Tahbildar ka don hapdeng ka jingkhuslai ha kine ki khyndiat bnai bad kala dih da ki dawai pynioh thiah. Ki Pulit kila ioh ruh ban kurup ia bun ki dawai pyniohthiah najan ka met jong ka ha ka Iingsah jong ka ha Guwahati.
Ha kawei ka liang, u Chaliha dang shen ula shah kynnoh ha ki katto katne ki briew ba ula shim kylliang ia ka pisa da ki klur tyngka haba ai daw b alai phew jait.
Kine ki briew kila knieh noh ia ka mobile phone, ka baje bad sdang dawa pisa ruh na u lyngba ki dur ba ialeh ieid bad ka Indrani.
Ka khubor ka iathuh ba u Chaliha ula shah kynnoh bamsap ia ka pisa ba kot palat T.10 klur bad ula shukor ruh ia bun ki samla wad kam hakine ki khyndiat bnai da kaba kular ba un pynioh kam.
“Ha ka jingtohkit, bun kiei kiei kila mih shabar halor kane ka jingpyniap ialade kane ka Heh BJP. Ngi la shim khia bha ban tohkit ia kane ka jingjia na baroh ki liang” ong ki Heh Pulit.
Pule ruh: Pyninam ka Tnad Arts and Culture ia ki Shnong Garo hapoh ka District Museum
PEIT:
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai!
