Guwahati, Nohprah 26: Ki Pulit ka Assam kila kem noh ia saw ngut ki briew kiba donkti ban pynjot bad pynpra ia ka St Mary’s English School ha Panigaon kaba hap hapoh ka Belsor Police Station jong ka Nalbari district.Kane ka jingjia kala jia ha ka 24 tarik u bnai Nohprah.
Katkum ka jingiathuh ki bor pyniaid district jong ka Nalbari, la ong ba u principal jong katei ka skul, u Fr Baiju Sebastian, u la ujor da ka jingthoh, ha kaba ha ka por kumba 2.30 janmiet jong ka 24 tarik u Nohprah, ki runar ki bym ithuh, ki la rung beain hapoh ka phyllaw jong ka skul bad pynjulor ia ka jaka pule.Kine ki runar ki la pynjulor ia ki jingpynitynnad ba shabar, ki serial light, ki khiew syntiew bad kiwei kiwei ki tiar, ha kaba katto katne na ki la thang ruh, kaba la wanrah ia ka jingduhnong.
Haba pynshong nongrim katkum ka jingujor la register case hapoh Belsor Police hapoh ka Case No. 116/2025 under Sections 329(3), 326(f), 189(2), 351(2), 324(3), 324(4) and 61(2) jong ka Bharatiya Nyaya Sanhita (BNS), 2023. Bad la shanniah bad aiti ha u Sub-Inspector Chanakya Das ban lam khmat ia ka jingtohkit.
Na ka liang ki pulit kila pyntikna ba ki briew kiba la shah kynnoh kila shah kem ha kaba iadei bad kane ka case kiba kynthup ia u Bhaskar Deka (34), District Secretary, Vishwa Hindu Parishad, u khun jong u Narayan Chandra Deka, uba shong basah ha ka shnong Balilecha, Nalbari district, Manash Jyoti Patgiri (32), Vice President, VHP, khun jong u (L) Mohan Patgiri, uba sah ha ka shnong Pub-Majdia, Nalbari district, Biju Dutta (34), Assistant Secretary, VHP, khun jong u (L) Kulen Chandra Dutta, uba sah ha ka shnong Telesia, Nalbari district bad u Nayan Talukdar (37), District Convenor, Bajrang Dal, khun jong u (L) Bhadra Kanta Talukdar, uba sah ha ka shnong Digheli, Nalbari district
Na ka liang u Myntri Rangbah u Himanta Biswa Sarma u la pynthikna ïa kitei ki jingkem bad ong ba ki Pulit ka Assam ki la leh kloi halor katei ka kam.U la pynpaw biang ïa ka jingkular jong ka sorkar ban pynneh ïa ka jingsuk bad jingïatylli ha ka imlang sahlang, bad ban pynthikna ïa ka jingshngaiñ jong baroh ki jaka pule bad ki nongshong shnong ha kylleng ka jylla.
Ki heh pulit ki la iathuh ba ka jingtohkit ka dang iaid shakhmat bad ki dang pynwan biang halor katei ka jingjia ban pyntikna lada don ka jingia donkti lang sa mano mano ki briew ha katei ka jingjia.
