Shillong, Nohprah 26 : Ka Bharatiya Janata Party (BJP) Meghalaya, kala pynrem jur ia ka jingjia ba dang shen “kiba ktah ia ka jinglehkmen ia ka aiom khristmas” bad dawa ban pynshitom tyngeh ia ki briew kiba donkti ha kine ki kam buh shun.
Ha ka kyrwoh bala pynmih ha ka sngi Thohdieng, u Nongaiktien ka BJP Bah Mariahom Kharkrang ula ong ba ka Khristmas ka dei ia baroh haba pynpaw ba ia kane ka jinglehkmen la lehkmen da baroh ki Jaidbynriew hapoh ka ri bad ka bat ia ka jaka ba kyrpang ha ka dohnud jong baroh ki nong India, khlem da pyniapher jaidbynriew, ka jingngeit ne ka niam.
“Ki kam buh shun bala leh da ki katto katne ki briew, kaba thmu ban pynthut bad khlem niew burom ia ka jingmut jong ka Khristmas, ka iaid pyrshah ia ka rukom long ka imlang sahlang ka ri India” ong u Bah Kharkrang.
Ula bynrap “Ka BJP, kum ka party, ka ngeit ha ka jingiatylli bad jingialong kawei jong baroh ki niam, ba bat skhem ha ka jingngeit hapoh ka riti synshar ka ri, bad ka kloi ban ieng iada ia ka hok jong baroh ki nongshongshnong ba kin rakhe ia man ki jingleh niam ha ka rukom kaba ki sngewbit”.
Une u Nongialam ka BJP ula pynrem ruh ia ka jingpyrshang ban leh politics ia kum kine ki jingjia haba kren bad u Myntri Rangbah Duh bad ki nongialam ka Party ki ju iashimbynta man ka sngi ha ki jingiaseng Khristmas kynthup ha une u snem ba mynta.
Une u Nongaiktien ka BJP ula dawa ba kito kiba donkti ban leh ia kine ki kam ba sngewsih ba ki dei ban shah kem, shah tian bishar bad shah pynshitom hapoh ki kyndon ba tyngeh jong ka ain.
 Meghalaya, kala pynrem jur ia ka jingjia ba dang shen “kiba ktah ia ka jinglehkmen ia ka aiom khristmas” bad dawa ban pynshitom tyngeh ia ki briew kiba donkti ha kine ki kam buh shun.){kind=link}