Guwahati, Jylliew 19 : San ngut ki briew kiba dei na kajuh ka longiing, kila iap na ka jingtwa khyndew kaba jia ha Karimganj District ka Assam hadien ka jingther u slap hynnin ka sngi Ba-ar.
Kat kum ka khubor, kane ka jingjia kala jia ha ka thain Badarpur jongka shnong Gainachora.
Kine kiba iap ki dei kiba tip kyrteng kum ka Roymun Nessa(55), Sahida Khanam(18), Jahida Khanam(16), Hamida Khanam(11), Mehdi Hassan(3).
Kat kum ka jingiathuh ki Pulit, ka Roymun Nessa ka dei ka kurim u Abdul Karim u bym shym la don satia ha iing ha ka por ba jia kane ka jingjia.
Na ka liang ka SDRF kala hiar sha kane ka jaka ban leit iarap wad ia kine ki briew kiba la shah tap ha ka khyndew.
“Ngi la ioh jingtip hynnin shiteng miet ba ka don ka jingtwa khyndew ha ka thain jong ngi.
Ngi la her wutwut sha katei ka jaka bad lap ba baroh shi longiing kila iap na ka jingtwa.
Baroh ki nongshongshnong bad ki SDRF kila iadonbynta mynta ban iarap sei ia kine ki briew. Haduh mynta ngi dang ioh sei ia 4 ngut” ong ki nong shnongshnong ka thain.
