Guwahati, Jylliew 6: Ka Congress ha jylla Assam kala dawa ban tohkit da ka CBI halor ka jyrsieh tih marpoh khyndew ha Kaziranga, haba kynnoh ia ka jingdonkti lang hapdeng u Myntri Rangbah Himanta Biswa Sarma bad u Chief Executive Member (CEM) Karbi Anglong Autonomous Council (KAAC) Tuliram Ronghang.
U MP barim u Ripun Borah u la kam ba ia ka jingtih marpoh khyndew beain ha Kaziranga-Karbi Anglong ka dei kaba la ioh ia ka jingdawa na ki briew kiba bat ia ka bor khamtam eh ki riew sain pyrthei ha hakhlieh duh.
Na ka liang u Borah u la kynnoh ba u Ronghang u la pynjot ia ki khlaw ki btap bad ki jingthung jingtep ha Karbi Anglong haba kynnoh ruh ba u Ronghang u la shna ia ka iing sah ka jong u ha Guwahati kaba shongdor haduh 2 spah klur bad u la maham ruh ba un hap shim ia ka jingbahkhlieh lada ka Congress kan wan ha ka bor ha u snem 2026.
Ka Central Empowered Committee (CEC) kala pyntikna ia kane ka jingbteng ban tih ne khlong beain ia ki marpoh khyndew kaba pynkhein ia ka hukum ka Iingkashari Supreme Court ba mih ha u snem 2019. Ka IIngkashari ka la khang pyrshah ïa baroh ki kam tih marpoh khyndew ha sawdong jong ka Kaziranga National Park.
Ka Congress kala dawa ban kem mardor ia u Tuliram Ronghang halor ka jingkynnoh ialeh pyrshah ia ki bor sorkar bad ban thung ia ka jingtohkit da ka CBI halor ki jingkynnoh. U Borah u la kynthoh ruh ia ka rai jong ka sorkar jylla ban weng noh ia ka jingpynbna Eco-Sensitive Zone (ESZ) na ka bynta 3,600 sq km ha kylleng ka Kaziranga, da kaba kynnoh ba la leh ia kane ban pynsuk ia ka jingtih marpoh khyndew beain.
