Itanagar, Iaiong 27: Ka ïingbishar ba kyrpang jong ka POCSO (Protection of Children of Sexual Offences) ha Yupia ha Arunachal Pradesh ha ka sngi Thohdieng ka la rai pynrem ïa uwei u rangbah ba 44 snem ka rta da kaba rai da ka jingiap namar ba u la leh beijot bunsien ïa la ka khun ruit ha u snem 2019.
U Special Judge (POCSO) u Dr Hirendra Kashyap u la rai pynrem ia u Lakang Tallang ha ka mukotduma jong u snem 2019 katkum ki kyndon jong ka Indian Penal Code (IPC), ba kynthup ia ka jingleh beijot da u briew uba don ha ka kyrdan ba lah ban shaniah bad ka kam runar da kaba pyntieng pynsmiej, pule ryngkat bad ka kyndon 6 jong ka POCSO Act.
Ka kashari ka la rai ba u nongshah kynnoh, uba dei u kynja kpa tymmen jong ka lanot, u la pyndonkam bakla ïa ka kyrdan jong ka jingshaniah ban leh ïa ka kam pohjait.
Katkum ka prosecution ba la lam khmat da u special public prosecutor u Kagam Bagra, katei ka jingjia ka la jia ha ka 4tarik Jylliew, 2019, ha kaba ia katei ka khynnah kynthei kaba dang rit ka rta, kaba dang pule ha ka kyrdan primary school ha kata ka por, la phah na Seppa sha ka iing sah jong ka hymmen kaba heh jong ka ha Doimukh.
U nongshah kynnoh, uba la ioh ka jingshaniah na kiba haïing ban leit bud ïa ka, la kynnoh ba u la pynkylla lynti ïa ka kali sha ka jaka ba kyndong hajan Kheel, u la byrngem ïa ka da u wait tukri (machete) bad u la leh beijot ïa ka ha kawei ka khlaw harud surok.
Ha ka jingbishar, ka prosecution ka la eksamin ïa ki 11 ngut ki sakhi, kynthup ïa ka lanot, ki bahaïing jong ka, ki riew shemphang ha ka liang ka koit ka khiah, bad u investigating officer.Ka jingiathuh jong ka lanot, kaba la buh jingthoh ha khmat ka ïingbishar katkum ka kyndon 164 CrPC, la shem ba ka long kaba ïahap bad kaba dei.
Ka kashari ka la rai pynrem ia utei u nongleh kam sniew da kaba rai pyniap katkum ka kyndon 6 jong ka POCSO Act, bad ka la pynngat ruh ia ka kuna kaba T.1 lak.
Ia kane ka mukotduma la rah sha Gauhati High Court ban pynskhem ia ka jingpynshitom iap.La bthah ia ka District Legal Services Authority ban siew ia ka bai lutksan kaba biang sha ka lanot kumba la pynbeit katkum ka Arunachal Pradesh Victim’s Compensation Act, 2011, nalor ka kuna, lada la thep da u nongshah rai pynrem, ban siew sha ka lanot kum ka jinglut na ka bynta ka rehabilitation.
 ha Yupia ha Arunachal Pradesh ha ka sngi Thohdieng ka la rai pynrem ïa uwei u rangbah ba 44 snem ka rta da kaba rai da ka jingiap namar ba u la leh beijot bunsien ïa la ka khun ruit ha u snem 2019.){kind=link}