Itanagar, Jymmang 21: Ha kawei ka jingiakhun ban leh tyngeh ia ka kynhun ki nong khaii briew, ka kynhun ki pulit ka Arunachal Pradesh kila ioh ban kem sa hynriew ngut ki briew ba kynthup ia ki pimp bad lai ngut ki riew jakhlia bad ioh ruh ban pyllait ia kawei ka khynnah ba dang rit ka rta kaba dei ka lanot na kawei ka jaka sah (lodge) ha Zoo Road, Chimpu.
Baroh ba ki pulit kila ioh ban kem ha kaba iadei bad kane ka case ki long haduh 21 ngut ki briew.
Haba bteng ia ka jingtohkit ha kaba iadei bad ka Itanagar WPS Case No- 20/24 u/s 373 IPC R/W Section- 6/8/12 POCSO Act and Section-3/4/5/6 of Immoral Trafficking Act la kem ia kine ki briew.
Ia kine ki briew kiba la shah kem la tip kyrteng kum u Dulal Basumatary (52) snem ka rta, u Dipali Basumatary (44) snem ka rta, u Saddam Hussain (26) snem ka rta, u Deepak Parajuli (24) snem ka rta, u Toi Bagra (35) snem ka rta bad u Bulang Marik.
Napdeng kine kiba la shah kem, u Bulang Marik uba dei u Deputy Superintendent of police ha Ist ASPBn bad u Toi Bagra, uba dei u pulit constable ka Ist AAPBn jong ki pulit ka Arunachal.
Hadien ba la ioh jingtip, ki pulit kila pynlong ia ka jingkhynra bad ki la ithuh ia kitei ki arngut ki tnga kiba pyniaid ia kawei ka hotel kaba kyrteng ka City Hotel ha Zoo Road Chimpu ryngkat bad u manager jong ka hotel kum u wei u pimp uba wan ia ki khynnah rit bad ban leh ia ka kam awria da kaba pynbiang ia ki briew ban leh ia kane ka kam awria.
Shuh shuh na ka liang ki pulit kila ioh jingtip ruh une u briew uba la shah kynnoh u donkti ruh ban khaii ia kawei ka khynnah ba dang rit ka rta bad kane ka khynnah kala kylla long ka lanot ha ka kam awria.
Halor kane, ki pulit kila pynlong ia ka jingkhynra ha katei ka hotel bad la kem ia kine ki briew kiba shah kynnoh.
Katkum ki pulit, u Dulal Basumatary udei uba ia don bynta lang ban pyniaid ia ka akm awria, ha kaba u wad ia ki customer na ka bynta kine ki khynnah da kaba pynbiang da ki kamra ha ki hotel khnang ba kine ki khynnah kin ngat ha kane ka kam awria. Shuh shuh la ong ba u khaii ruh sa ia kawei pat ka khynnah kynthei ia kaba la tip kum ka Miss F bad pynlong ruh ia ka ban ia don bynta ha ka kam awria” ong u wei u ophisar pulit.
Shuh shuh ki heh ophisar kila ong, “Ia ka la ri bad pynheh pynsan da u Dulal bad ka Dipali naduh ba ka dang rit bad la pynbor ia ka ban leh ia kane ka kam kum ki thei dakaid ne thei nuti hadien ba kala kham heh kham san bad ia kane ka kynthei la pynkynriah noh ha Shelter Home bad mynta ka dang don hapdeng ka jingshah sumar”.
Shuh shuh, ka kynhun pulit ka la ithuh ruh ia arngut ki nongleh beijot kaba dang shen ki la leh beijot ia ka khynnah kynthei kaba dang rit kaba la koit mynta ka Miss F, bad la kem ruh ia ki arngut ki nongleh beijot.
