Shillong, Nailar 08: U Nongialam bad MLA ka BJP na Pynthorumkhrah Bah Alexander Laloo Hek, hynne ka sngi nyngkong ula ong ba um tharai satia ba kan don ka jingkput kam sain pyrthei halor ka jingkem ia u Vice President bad MDC ka BJP na Tura u Bernard N Marak.
Kane ka jingkren une u Nongialam kala kyrtoh kylla ia ka jingkynnoh ki Nongialam ka BJP Meghalaya ba ka don ka jingkput kam sain pyrthei halor ka jingkhynra ia ka Farmhouse bad ka jingkem ia u Bernard ba ju khot sin u Rimpu.
Hynrei u Bah Hek ula pynrem pat ia ki Pulit halor ka jingkynnoh leh donbor pyrshah ia ki Nongkitkam bad nongkyrshan jong ka BJP ha Ri-lum Garo.
“Ka long ka bym dei ia ki Pulit ban thombor ia ki Nongtrei ka BJP da kaba khot hajir ia ki shiteng miet bad bat ia ki ha thanad da ki bun bun kynta” ula ong.
Haba kylli, une u Myntri barim ka Jylla ula ong “Ka dang kloi palat ban pynthikna la ka don shisha ne em kata ka jingkput kam sain pyrthei”.
Hynrei u Bah Hek ula kyrshan pat ia ka jingdawa jong ka Party ba donkam ban thung ia ka jingtohkit ba laitluid halor kaei kaba jia hapoh ka Farm house u Bernard ha Rimpu Bagan, ka jingkhynra ia kane ka jaka bad ka jingkem ia u Bernard.
Haba kylli la kum kane ka jingjia kan ym ktah ia ka jingiadei hapdeng ka BJP bad NPP, u Bah Hek ula ong ba baroh ki seng sain pyrthei ki lah ban iatreilang kum ka kynhun synrop hynrei haba poi ha ka por ialap elekshon, ki don la ki jong ki mat ialap elekshon (manifesto) bad ka thong.
