Shillong , Nailar 08: U MLA ka BJP na Pynthorumkhrah, Bah Al Hek ha ka sngi Nyngkong u la pyllait paidbah ia ka kot [email protected] kaba dei ka kot shaphang ka jingiaid lynti kaba 20 snem jong u Narendra Modi kum u Myntri Rangbah ka Jylla Gujarat bad ruh kum u Myntri Rangbahduh ka Ri.
La donlang ruh ha kane ka sngi naduh u Vice President ka party Bah David Kharsati, nangta ruh u nongkren ba la khot kyrpang ha katei ka sngi u Sunil Arora ba dei ruh u CEO ka Health Sevak.
Haba kren kum u Kongsan, u Bah AL Hek u la iathuh ba ka jingkiew jong u Modi shaduh ka kyrdan kum u Myntri Rangbahduh ka Ri kadei na ka jingsngewrit naduh ka por ba u dang trei kum u nongialam ka party, nangta kum u National Incharge jong ka BJYM bad ter ter haduh ban da poi sha katei ka kyrdan.
“Nga la ithuh ia u Prime Minister Modi naduh 25 snem mynshwa naduh ka por ba nga dang long kum u Myntri ka tnad pule Puthi jong ka jylla,” ong u Bah Hek.
Nalorkata u ong ruh ba ka pyrthei baroh kawei mynta ka tip shaphang u Myntri Rangbahduh jong ka Ri, u Narendra Modi. “Ka jingjop jong u kum u nongialam kadei namar ka jingsdang jong u naduh iba rit bad ruh da ka jingsngewrit,” bynrap shuh shuh u Bah Hek.
La ioh ruh ia ka jingkren ba u Sunil Arora uba la batai ia ka jingiaid lynti jong u Modi naduh ba sdang ia ka kam saiñpyrthei.
Katkum ka jingong jong u, ia katei ka kot la thoh da bun ngut ki riewshemphang na kylleng kylleng.
U la ong ruh ba katei ka kot ka kdew ruh naduh ka por jingbat jong u Modi kum u Myntri Rangbah ka Gujarat naduh ki snem 2001 ter ter haduh ba un shimti kum u Myntri Rangbahduh ka Ri naduh 2014 bad iai bteng haduh mynta.
