Shillong, Rymphang 21 : Ka Sorkar Jylla ka dang ap ia ka kaiphod jong ka Working Group Committee haba iadei bad ka jingtyrwa pynkylla ia ka thup Scheduled Tribe hapoh ka Presidential Order 1950.
“Ka Sorkar lyngba ka jingpynbna ba 13 tarik Nohprah, 2024, kala thung ia ka Working Group Committee ban bishar ia ka thup ki jaidbynriew Scheduled Tribe na Meghalaya na ka bynta ban pynkylla ia ka Part-XI jong ka Schedule jong ka Presidential Order 1950, kaba iadei bad ka Jylla Meghalaay bala khot ka “Constitution Scheduled Tribes Order 1950”, kaba kynthup ia u Chairperson, Member Secretary bad phra ngut ki dkhot” ong u Myntri Rangbah Conrad K Sangma haba ai jubab hapoh ka Dorbar Mang Tyngka ka Iingdorbar Thaw Ain.
Ka Committee kala pynlong haduh lai tylli ki jingialang haduh mynta-ha ka 5 tarik Rymphang, 15 tarik Jymmang bad 14 tarik Nailar, 2025.
Halor ka por jinglong jingman ba mynta haba iadei bad ka kaiphod,u Conrad ula ong ba kane ka kam ka dang iaid mynta bad ym pat pynthikna ia ka tarik ban pynlait ia ka.
