Shillong, Nailur 24 : Ka Sorkar Jylla ka dang ap ia ka kaiphod jong ka Expert Committee hashuwa ba kan shim ia kano kano ka sienjam halor ka jingkynnoh kyntur ka University of Science and Technology Meghalaya (USTM) sha ka jaka khlaw.
La bthah ia ka Expert Committee bala khlieh da u Addl Deputy Commissioner ka Ri-Bhoi bad kynthup ia ki dkhot na ka Pollution Control Board, Mining & Geology bad bor District, ba kan aiti ia ka kaiphod jingtohkit hapoh ka 15 tarik u Risaw.
Ka kamram jong ka Committee ka long ban leit jurip ia ka jaka bad ai ia ka kaiphod ba bniah halor ka jingkynnoh kyntur sha ki jaka khlaw da ka USTM.
“To ngin ap bad peit ia ka kaiphod bad hadien ba ngi ioh ia ka kaiphod ngin sa lah ban iathuh ia phi ia kiei ki kam ba ngin na ka Sorkar Jylla” ong u Symbud Myntri Rangbah Bah Prestone Tynsong haba iakren bad ki lad pathai khubor ha ka sngi Balang.
Ula pynpaw ruh ban phikir bha pyrshah ia ka jingshim rai kyrkieh, da kaba pynpaw ba ka jingrai ban shu khang khyrdep ia kiei kiei khlem da shong bishar bha kan dei ka kam kaba bakla.
“Hynrei nga sngew shimet ba lada phi shu kren matlah ba phi hap ban khangdam ia kiei kiei baroh, nga sngew ba ka dei ka bym dei satia” ong u Bah Prestone.
Ia ka Expert Committee la thung hadien ka kaiphod jong ka Central Empowered Committee bala thung da ka Iingkashari Supreme Court, kaba la ai jingmut ban dain kuna haduh T. 150 klur ia ka USTM namar ka jingpyndonkam ia ka jaka khlaw khlem da ioh ia ki jingbit.
Ka kaiphod CEC ka pynpaw ruh ba ka USTM kala kyntur ia ka jaka ba jan kot 25 hectare ba long khlaw ha Ri-bhoi District, kaba pynkhein ia ka Forest Conservation Act, 1980.
 sha ka jaka khlaw.){kind=link}