Shillong, Nailur 14 : U Myntri Rangbah ka Jylla Conrad K Sangma ula ong ba ka Sorkar ka dang ap mynta ia ka jubab na ka Hynniewtrep National Liberation Council(HNLC) ban iapyniaid biang shakhmat ia ka jingiakren iasuk.
Haba iakren bad ki nongthoh khubor, u Myntri Rangbah ula ban jur ia ka jingdonkam ban don ka jingiakren kaba shitrhem na baroh ki liang kiba don ha ka miej iakren iasuk. Ula kdew ba baroh ki kynhun ki dei ban pyni ia ka jingshem jingmut haba iadei bad ka jingiakren iasuk.
U Myntri Rangbah u pyntip ba ka Sorkar kala dep ban phah ia ki katto katne ki mat ba kongsan sha ka HNLC. “Hadien ba ngi ioh ia ka jubab na ki, ka Sorkar kan sa pyniaid biang shakhmat ia ka jingiakren”.
Lah ban kdew hangne, u Symbud Myntri Rangbah ka Tnad kam Pohiing Bah Prestone Tynsong ula iathuh ba ka Sorkar Jylla bad Sorkar Pdeng, kila buh kyndon ba u Chairman bad u General Secretary jong ka HNLC, ki dei ban iadonlang noh ha ka jingialang iakren iasuk.
“Katba ngi dang jam shakhmat, ki don katto katne ki kam ba sngewkhia, katto katne na ka liang jong ki bad katto katne na ka liang ka jong ngi. Ngi dang iakhmih mynta ba kumno ngin leh ia kine kiei kiei baroh. Ngi la phah ia ki katto katne ki mat sha ki (HNLC) bad ngi dang ap mynta ia ka jubab” ong u Conrad.
Haba kylli halor ka jingchargesheet ka National Investigation Agency (NIA) pyrshah ia ki Nongialam ka HNLC, u Conrad ula pynshai ba kine ki dei ki case kiba rim jong ka Sorkar Pdeng ym jong ka Sorkar Jylla bad ka Sorkar Jylla kala dep ban pyntip sha ka HNLC halor kane.
