Shillong, Naitung 10 : U Myntri ka Tnad Pule Puthi Rakkam A Sangma hynne ka sngi Nyngkong, ula pyntip ba ka Sorkar Jylla ka dang ap ba ka jinglong jingman ha Manipur kan jai jai noh shuwa ba kan shim rai halor ki samla pule, kiba la wan phai shala iing namar ki kam iaumsnam ha katei ka Jylla.
“Ngim pat shim rai eiei halor kane ka bynta. Ngi dang ap ia ka jinglong jingman ha Manipur ba kan jai jai noh hynrei kane kam shym la jia satia…ngin hap ban shong bishar bad shim rai na ka bynta ka bha ka miat jong ki samla pule kong ngi namar ka jingiakynad kam ikut satia ha Manipur” ong u Rakkam.
Haba kyrpad ban wanrah noh ia ka jingsuk ha Manipur, u Myntri ula ong “Nga kwah ban kyrpad naduh ka mynsiem ia ki paralok ha Manipur ba ka jingsuk ka dei kaba donkam eh mynta namar ka jingim ka dei kaba kham kongsan ia kano kano ka jaidbynriew”.
U Rakkam ula pyntip ruh ba ula ioh khubor ba ki University bad ki jaka pule ha Manipur kila sdang ban shim ia ki online class na ka bynta ki samla pule.
“To ngin ap bad peit ia kaei kaba ngin hap leh hadien habud. Kum ka Sorkar, ngin hap wad ia ki lad ki lynti ban leh eiei ia kane ka jingeh na ka bynta ka bha ka miat ki samla pule jong ngi” ula kular.
Pule lang ia kane: Kem ki BSF bad RWDO ia ki Nong Bangla ba wan pom dieng tuh ha Nongjri
