Shillong, Naitung 10 : Ka Sorkar Jylla kala rai ba shen kan sa pyndonkam noh da ki kot ka National Council of Educational Research and Training (NCERT) ha ki skul hapoh ka Jylla.
Haba pyntip ia kane hynne ka sngi Nyngkong, u Myntri ka Pule Dangle Rakkam A Sangma ula iathuh ba ula dep iakynduh dang shen ia u Chairperson ka Central Board of School Education (CBSE) ha New Delhi.
Ha kane ka jingialang la iadonlang ruh u nongaibuit ka Tnad Pule Puthi ka Jylla Bah Himalaya Shangpliang lem bad ki Ophisar na ka DERT.
U pyntip ba ka Jylla kala kyrpad ia ka CBSE ba kan iarap ia ka Tnad Pule Puthi ba kan pyndonkam noh da ki kot ka NCERT ha ki skul kiba don hapoh ka Jylla.
“Ki bor pyniaid ka CBSE kila kular ba kin sa ai ia ki jinghikai ia ki nonghikai jong ngi. Ngin sa phah ia ki katto katne ngut ki nonghikai na ka Jylla sha Delhi ba kin leit hikai pyntbit bad kin sa wan ruh sha Jylla ban ai jinghikai bad ban iarap ia ka tnad Pule Puthi halor kane ka kam” ula ong.
Ia kane ka rai la shim ruh hadien ba bun na ki jingkylli jong ka eksam CUET ka dei kaba la set na ki kot ka NCERT.
U Myntri ula pyntip ba ia ka kam ba iadei bad ka CUET ruh la iakren bad u Myntri ka Ministry of Human Resource Development bad iathuh ba ka National Testing Authority (NTA) kan sa buh ia ki CUET centre ha Shillong, Tura bad Jowai shuwa ka eksamin jong u snem ban sa wan.
“Kiba bun ki samla jong ngi kila ngat ha ki centre shabar ka Jylla mynta u snem. Hadien ka jingtuklar jong u Myntri Rangbah ka Jylla, kiba bun ki bym ioh leit ialeh ia ka eksam kin sa iohlad ban ialeh biang” ula ong.
Pule lang ia kane: Plie u Myntri ka Sorkar Pdeng ia ka jaka pynmih tungtab ha Eastern West Khasi Hills
