Shillong, Rymphang 06: U Myntri Rangbah ka Jylla Conrad K Sangma ha ka sngi Ba-ar, ula sam bad aiti ia ki shithi thungkam sha ki 346 ngut ki nonghikai skul LP bad pyllait paidbah ruh ia ki Teaching Learning Materials Kit bala tip kum ka ‘Jadui Pitara’ bala mang sha ki Khynnah rit ba dang rung skul nyngkong.
Ia kine ki shithi thungkam la aiti ha ka jingialang kaba long ha State Convention Centre, Shillong ha ka jingiadonlang u Myntri ka tnad pule puthi Rakkam A Sangma.
Haba ai jingkren ha ka jingialang, u Myntri Rangbah ula ong ba kane ka prokram kam dei satia kaba kut tang ha ka jingsam ia ki shithi thungkam sha ki Nonghikai skul LP ba dang shu ioh kam hynrei ka dei ruh ka sngi ban pyntip ia ka thong bad ka jingangnud jong ka Sorkar Jylla.
“Ngi baroh ngi dei shibynta jong ka kynhun mynta, ngi lah ban leh ia ki kam bapher bapher ha ki kyrdan bapher bapher hynrei ngi don hangne ban kynjoh ia kajuh ka thong kata ban pyntyllun shakhmat ia ka Jylla” ula ong.
U Myntri Rangbah ula ong ba ka jingkynshew ha ka pule dangle ka dei ka jingkynshew kaba heh duh. Ula kyntu ia ki nonghikai ba dang shu ioh kam ba kin sdang ia ka kam da ka jingpyrkhat kaba bha kata ba kum ki nonghikai ki dei ym tang ban ai jinghikai hynrei ban saindur ruh ia ka jingim jong ki Khynnah hapoh ka jingkhmih jong ki.
U Rakkam haba ai jingkren, ula ong ba ka kam hikai ka dei ka kam ba don burom tam bad ong “Haba phi ai ka jingshakri da ka jingaiti lut, phi don ia ka bor ban wanrah ia ka jingkylla, kumta ngi phah ia ki da ka jingngeit skhem ba phin tynrong lem ia ka thong bad jingbahkhlieh bad ka Sorkar”.
U Myntri ula maham ruh pyrshah ia ka kam ai kam pateng (proxy) da ki nonghikai ia kiwei pat ki briew ha ka jaka jong ki namar kane kan ktah jur ia ka pule dangle jong ki Khynnah.
Ha kane ka sngi, u Myntri Rangbah bad ki kynrem ki lyndan kila pyllait paidbah ruh ia ka Teaching Learning Materials Kit bala tip kum ka ‘Jadui Pitara’ bala mang sha ki khynnah rit ki ba dang rung skul thymmai.
Kumba 35000 ngut ki khynnah kin ioh ia kine ki tiar pule lyngba ki Nonghikai skul LP tang mar syn sdang long skul. Kine ki tiar ki kynthup ia ki activity sheets, worksheets, flashcards, posters, game board bad kiwei kiwei.
