Shillong, Rymphang 05 : U Symbud Myntri Rangbah ka Jylla bad Chairman ka Regional Committee ka West Jaintia Hills Bah Sniawbhalang Dhar ula ong ba ka jingkylli ban iasoi ia ka soskular bad ka Assam kan ym mih satia namar ka kam ba iadei bad ka Block-I ka dang don hapoh ka jingiakren.
Haba iakren bad ki nongthoh khubor, u Bah Sniawbha ula ong ba kane ka kam kan dang ban iakren hapdeng ki artylli ki Jylla.
“Lada dei ban iasoi ia ka soskular, ngi hap ban iasyllok bniah bha bad ki trai shnong ka thain bad ka jingkylli ban iasoi soskular mynta kam pat mih satia nab aka dang don hapoh ka jingiakren” ula bynrap.
Kane ka jingkynthoh jong u kala mih hadien ba ka seng Hynniewtrep Border Disputes Redressal Forum (HBDRF) kala dawa ia ka Sorkar ba kam dei ban iasoi ia kano kano ka soskular bad ka Sorkar Assam lad aka kyntait ban pynphai ia ka Block-I sha Meghalaya.
Halor ka jingialang jong ka Regional Committee, u Bah Sniawbhalang ula ong ba ki Regional Committee jong baroh artylli ki Jylla kin dang ban iakynduh namar ba ki dang bunkam ia ka elekshon Lok Sabha ban sa wan.
Haba kylli, u Symbud Myntri Rangbah u pyntip ba ia kaiphod jong ka Regional Committee ruh yn dang ban aiti sha ka Sorkar.
“Kane ka dei namar ba ka dang don ka jingjurip bala leh da ki DC ha khappud bad ngi dang pyrshang ban wad ba haduh katno tylli ki Shnong kiba shongshnong da ki Khasi bad katno kiba sah ki Karbi. Ka jingjurip ka dang iaid shaid shaid mynta” ula ong.
Haba iadei bad ka kam ban pynkynriah ia ka Them Metor na Them Iew Mawlong, u Bah Sniawbhalang u pyntip baka Sorkar shen kan sa shong jingialang biang bad ka Harijan Panchayat Committee (HPC) ban shim ia ka rai ba khatduh halor kane ka kam.
Ula ong ba ka Sorkar kala pyrshang kat kaba lah ban pynbeit noh ia kane ka kam hapoh une u snem ba mynta. Kat kum ka jingong jong u, kam don shuh kano kano ka jingwit namar baroh arliang mamla kin sa iashong jingialang biang shen.
“Ka Iingkashari kala ong sngewbha pynbeit noh ia ka jingeh bad mynta ngi lah iaid shaid shaid ban pynbeit ia ka jingeh hapdeng ka Sorkar bad ka HPC” ula ong.
