Shillong, Lber 16 : Ka Sorkar Jylla kala aipor ia ka Harijan Panchayat Committee (HPC) ban aiti ia ka jubab hapoh ka 10 tarik Iaiong haba iadei bad ka jingtyrwa ban pynkynriah ia ki 342 tylli ki longiing na Them Metor, Them Iewmawlong sha ka jaka ka Shillong Municipal Board (SMB).
“Ngi la dep aiti ia ka blueprint (halor ka jingtyrwa ka sorkar) sha ki bad ngi la aipor ban jubab tad haduh ka 10 tarik Iaiong” ong u Symbud Myntri Rangbah ba khmih ia ka Tnad Urban Affairs bah Sniawbhalang Dhar haba iakren bad ki nongthoh khubor hadien ba dep shong jingialang bishar kam jong ka Tnad.
Ula ong ba ia kane ka jingbthah la shim hadien ba ka HPC kala pan por lai bnai ban ai jubab ia ka jingtyrwa ka sorkar.
“Hynrei, ngi khlem mynjur ia ka jingkyrpad jong ki bad ngi la rai ban aipor ia ki tad haduh ka 10 tarik Iaiong ba kan jubab sha ngi” ong u Bah Sniawbha haba jubab ” Hadien kane, ka High Level Committee (HPC) kan sa khot ia ka jingialang ban shim ia ka rai ba khatduh halor kane ka kam”.
Haba kylli, u Symbud Myntri Rangbah ula ong ” Ngin sngap shuwa ia kaei kaba ki (HPC) ki don ban ong bad hadien kane ngin sa lah ban iathuh ia phi ia kaei kaba ngi dei ban leh bad kaei ka bym dei ban leh. Kam iahap ia nga ban iathuh ia phi ia kaei kaba ngin leh”.
