Dawa thung da ka kynhun tohkit ba laitluid
Shillong, Naitung 30 : Ka seng Khasi Students Union (KSU) kala aipor 48 kynta ia ka Meghalaya Public Service Commission (MPSC) ba kan pynshai ia ki kynrum kynram kiba mih na ka eksam thungkam Ophisar MCS, MPS bad Statistical Officer ka Tnad Animal Husbandry & Veterinary.
Ka KSU lyngba ka Employrment Monitoring Cell, hynne ka sngi Ba-ar, kala leit buh da ka dorkhas hakhmat u Chairman bad Secretary ka MPSC ba pynpaw ia kane ka jingaipor.
“Ka Seng kam sngew iahap ia ka jingpynshai jong ka MPSC kaba mih ha ki lad pathai khubor ha u 26.07.2024 ban pynksan ia ki jingleh thurmur khlem da sngewkhia ba ka ialehkai bad ka jingim ki samla jong ka jylla” ong u samla Reuben Najiar Chairman ka Empoyment Monnitoring Cell ka KSU.
Ha kane ka dorkhas, ka KSU kala dawa ia ka MPSC ban pyllait paidbah ia ki marks jong baroh kiba iakhun ia ka eksam MSC (prelims) khnang ba ki nongialeh eksamin kin shai halor ka jingshah jied bad shah kyntait jong ki ban ioh ialeh ia ka eksam (mains). Ka seng ka dawa ruh ban thung da ka kynhun tohkit ba laitluid halor kane ka kam.
Ka KSU kala dawa ruh ban pynshai halor ka jingduna ki samla kiba shah jied ha ka personal interview jong ka eksam MPS.
“ Katkum ka advertisement jong ka MPSC, ka pyni ba yn jied ia ki samla sha ka personal interview katkum ka ratio 1:10 haduh 1:2.5 na ka post ba lait. Te namar ba pynlait ia 17 tylli ki post ha u snem 2019, kumta ba duna tam ban shah jied ha ka personal interview kan dei 42 ne 43 ngut, hynrei la iohi ba ki jied tang 27 ngut bad kane ka la pynkheiñ ia ka kyndon kaba ka MPSC hi ka lah buh” ong ka KSU.
Ka KSU ka buh ka dak jingkylli ba shaei kita ki 15-16 ngut ki samla ki jah bad kim shim lah mih kyrteng na bynta ka personal interview.
Haba phai sha ka result jong ka Statistical Officer ka tnad Animal Husbandry & Veterinary, ka KSU kala kdew ba la iohi ba la jied tang 2 ngut ki samla, iwei na ka Khasi-Jaintia category bad uwei n aka Garo category kat kum ka jingpynbna bala pyllait ha ka 27/06/2024.
“Kaba sngew lyngngoh ka long ba katkum ka advertisement ba la pynmih ha ka 14.12.2020 pat, ka jinglaitkam ka dei tang na bynta 1 (kawei) ka post bad ia kane la pynskhem biang da ka Corrigendum ba lah mih ha ka 14.09.2022 kaba dei ban dei thik tang ia kawei ka post na bynta Khasi-Jaintia category” kala kdew.
Ka Seng ka lah buh ka jingmaham ia ka MPSC ba lada kam lah ban pynbeit ne pynshai halor kine ki bynta hapoh 48 kynta, ka Seng kan shim ia la ka jong ka sien jam.
 kala aipor 48 kynta ia ka Meghalaya Public Service Commission (MPSC) ba kan pynshai ia ki kynrum kynram kiba mih na ka eksam thungkam Ophisar MCS, MPS bad Statistical Officer ka Tnad Animal Husbandry & Veterinary.){kind=link}