Shillong Nailur 05: Ha ka sngi rakhe ia ka Teachers’ Day ne ka sngi burom ia ki nonghikai, u Myntri ka pule puthi u Rakkam A Sangma ula ai khublei ia ki nonghikai kiba don ha ka jylla bad ha ka ri hi baroh kawei.
“Phi ki nonghikai phi long u paia jong ka ri. Ka jingnoh synniang ka jong phi ka long kaba kordor bha ia ki paidbah ka jylla bad ka jingnoh synniang ka jong phi kan rai ia ka lawei jong ka jylla bad ka ri” la ong u Rakkam Sangma haba iakren bad ki nongthoh khubor hynne ka sngi Thohdieng.
Ula pynpaw ba kala don ka jingkiew ha ka liang ka pule puthi ha kine ki snem kiba la dep bad kane ka burom ka leit sha ki nonghikai kiba la trei met bad mynsiem.
Ha kaba iadei bad ka mat jong ki nonghikai ki bym pat ioh ia ka jingpyntbit, u Sangma ula ong, “Kane kadei ka mat kaba donkam ban iatai sani namar ba ngi don bun ki nonghikai ki bym pat pyntbit. Hynrei kila don katto katne ki jingeh kiba iadei bad ka NIOS bad DIET ia kaba kim lah ban pynbiang lut ban ai jinghikai pyntbit ia ki nonghikai. Ka Sorkar India kala sdang ia ka jingai jingshakri lyngba ka NIOS bad IGNOU, ia kaba kala pynsangeh noh ia mynta. Hynrei kane kam shim la iapeiñ pat ia ka kyrdan jong ka jingai jingshakri ha ka kam hikai. La kidei ki nonghikai kiba la tbit ne ki bym pat pyntbit hynrei kila ai ia kaba bha tam”.
“Ha kaba iadei bad ka jingsngewkhia jong ka sorkar, ngi kwah ban noh synniang ha baroh ki bynta. Kumta ngi lah sdang ban tei ia ki iingskul, ki jaka sah bad ban pynthymmai ia ki bynta baroh ha ka liang ka pule puthi. Kumta ngi lah don beit bad ki nonghikai” ula ong bad ka kyrpad ia ka jingkyrshan bad ka jingiatreilang jong baroh kiba donbynta lang ha ka kam ban kyntiew bad pynbha iaka pule puthi ha ka jylla.
