Guwahati, Rymphang 07: Ban kyntiew ia ka roi ka par jong ki shnong ba sha kyndong kynshrot jong ka Arunachal Pradesh, ka surok ka dei kaba kongsan tam bad ka Sorkar Pdeng kala shim ia ka sienjam ban pynshna ia ki surok sha kine ki thain da ka jingmang pisa haduh T. 3000 klur ban shna ia lai tylli ki surok ba kham kongsan eh hapoh ka Jylla.
Ka song pisa ba nyngkong, ka dei T 626.93 klur la ai ha ka package-I ban shna ia ka surok Sarli-Huri kaba iasoh bad ka NH-913 Frontier Highway.
Kane ka project ba 35 Km ka dei kaba pyntrei da ka EPC (Engineering Procurement Construction) mode ha Kurung Kumey district. Kane kan pynthikna ia ka jingiaid ki kali ba khlem thut ha kane ka surok nalor ka pyniasoh ruh ia ki shnong ki thaw kiba don ha ka thain.
Ka song pisa ba-ar ka dei T.2,248.94 klur na ka bynta ka Lada-Sarli jong ka National Highway -913 bad kane ruh kan long da ka EPC mode, ka ban ai ka jingshari ia ki jaka ba bun paid eh jong ka Upper Arunachal.
Kane ka surok ba 105.59 Km kan iarap ban pynjanai ia ki lad pyniasoh na ka bynta ki bor pahara bad ruh ban pynioh ia ki surok kiba donkam sha ki shnong ki thaw. Ia kane ka project la iohi kum kawei ka lad ban kyntiew ia ka ioh ka kot jong ki paidbah ban ban tehlakam ia ka jingkrih shnong jong ki briew na khappud.
Ka song pisa ba lai ba dei T. 1014.59 klur bala mang sha ka surok Kharsang-Miao-Vijaynagar-Gandhigram jong ka National Highway – 913 ka ban shakri ia ki shnong kiba don bun bha ki nongshongshnong ha Upper Arunachal.
Haba thoh ha X, u Myntri ka Sorkar Pdeng Kiren Rijiju ula ong “Ka khyllip mat ban sah jingkynmaw bala pynurlong ia ka jingkwah jong nga ia ki lad pyniasoh ha Arunachal Pradesh. Hapoh ka jingialam u PM Narendra Modi bad u Nongialam Niti Gadkari, shibun bah la pisa la mang sha ka Jylla”.
