Shillong, Iaiong 23 : U Myntri ka Tnad Pule Puthi Bah Lahkmen Rymbui ha ka sngi Balang ula ong ba iaka tulop thymmai bala pynbeit ryntih ia palat 23000 ngut ki nonghikai ha Jylla la pyntreikam naduh ka 1 tarik Iaiong, bad ia ka tulop yn sa pynlait ha ka 1 tarik Jymmang lane ha ka taiew ba nyngkong u Jymmang.
“Ka tulop bala pynbeit ryntih lah pyntreikam mynta naduh ka 1 tarik Iaiong. Ngi donkam satang ban pynlait iaka tulop ha ka 1 tarik Jymmang lane ka taiew ba nyngkong jong u bnai” ong u Bah Rymbui haba iakren bad ki nongthoh khubor.
Haba shim ia ka kum ka kam kaba la sahteng la slem bha, u Myntri ula ong “Ka jingeh ka don hynrei ka dei ka jingeh kaba ki Sorkar kiba la leit noh kim shym la lah ban leh eiei. Nga sngewkmen ba hapoh ka jingialam jong u Myntri Rangbah Conrad K Sangma ba ia kane ka kam la lah ban pynbeit mynta”.
Ula ong ba ka sienjam hi ka dei halor ka jingsiew ba kham bun.
“Kawei ka long ba ngi lah ai ka burom sha ka jingshakri ba ki nonghikai kila ai, ngi lah pynthikna ia ka jingskhem ka kam jong ki, ngi la lah ban pynthikna ia ka jingthikna ka kama. Kumta, kam dei ka jingkylli tang ia ka jingpyntreikam ia kane ka jingsiew ba thymmai, ka dei ka jingkylli halor ka jingai sha ki ia ka burom, ka jingskhem ka kam bad ka Sorkar ka ai ka jingithuh ia ka jingtrei shitom jong ki”.
Halor ka jingpia ryngkat ka jingsiew bad ki nongtrei Sorkar, u Bah Rymbui ula ong “hooid, ngim lah ban leh lane siew ia kaei kaba siew sha ki nongtrei Sorkar hynrei ngi la pyrshang kat kaba lah bad da ka jingiatreilang jong baroh, suki suki ngin sa lah ban pynkylla kat kaba ngi lah”.
Ula bynrap ba ka jingpynbeit thymmai ia ki skul ruh ka dang iaid shakhmat.
“Kumba long mynta, ka jingpynbeit thymmai ia ki skul ka dang iaid. Nalor kane, kane kan ym urlong khlem ka jingiatrei lang jong ki kynhun kiba don bynta” ula ong.
“Kumba u Myntri Rangbah ula ong ba ka pule puthi ka dei ka kam ba hakhmat eh, ngin pynthikna ba ngi dei ban lah haka ban wanrah jingkylla lane pynbeit ia kawei hadien kawei na kiba bun ki kam kiba rim”.
Halor ka jingpynshisha ia ki nonghikai, u Myntri ula ong “Ngam don jingkhein satia bad nga hynrei u DSEO bad SDSEO kila leh ha ki district bad ki sub-division”.
