Shillong, Iaiong 23: U Joint Director ka tnat Civil Defence bad DIG ka SDRF Bah B Mukhim u la kyntu ïa ki paidbah ba kin iatreilang bad ïashim bynta haka Mock Drill jong ka Air Raid bad ka Blackout ka ban long ha ka 24 tarik Iaiong ban pynkhreh iaki nongshong shnong, lada ka Ri ka shah thombor haki nongshun.
“La kyrpad ia ki paidbah ba kin sngewbha ban iatreilang bad ban iashim bynta ha ka Mock Drill ia kaba la pynlong na ka bynta ka jingshngain bad ban iada iaka Ri” ong u Bah Mukhim.
Ia ka Mock Drill kaba la ai kyrteng “ARMEX-1 2026″ yn pynlong da ka tnat Directorate of Civil Defence & Home Guards, Meghalaya, hadien ka jingbthah daka tnat Ministry of Home Affairs ka Sorkar Pdeng.
Ia kane ka Mock Drill yn pynlong ha baroh ki district jong ka Jylla bad yn shim bynta lang daki shipai Air Force, Army, Police, SDRF, Home Guards, Civil Defence Wardens & Volunteers, Fire & Emergency Services, ka tnat ka koit ka khiah, ka tnat Bording, SDMA, DDMA, DIPR, ki Dorbar Shnong, NCC, NSS bad NYKS,
Iaka ARMEX-1 2026 yn pynlong ha ar bynta.
“Ka STAGE I, ka kynthup ka jingwad iaki ba mynsaw, ban pyllait im, ban iakhun iaka sing, ka jingpynkynriah bad ka jingsumar iaki briew, ka STAGE II kadei kumno ban pynkhreh lada sawa ka Air Raid Sirens bad ka jinglip Bording (Blackout) la ong u Mukhim.
Ka Stage I kan sdang naduh ka por 3 baje janmiet haduh 4 baje janmiet.
“Ïa ka Siren jong ka Civil Defence yn pynsawa ha ka por 3 baje janmiet ha baroh ki District ka Jylla ban pyntip ba don ka Air Raid bad ka jingsdang ïa ka Mock Drill” u la ong.
Ka siren kan sawa biang ha ka por 4 baje janmiet ban pyntip ba baroh la biang lut bad ka jingpynkut ia ka Stage I. Ka Stage II, kata ka jingpynlong ia ka Blackout kan iaid naduh ka por 6:59 PM haduh 7:02 PM. “Ïa ka Siren jong ka Civil Defence yn pynsawa ha ka por 7 baje janmiet ban pyntip ba don ka Air Raid bad ka jingsdang jong ka Blackout” ula ong.
“Nga kyrpad ïa ki paidbah ba sngewbha ban ïashim bynta lang ha ka Mock Drill da kaba pynlip noh ïa ki bording, ki inverter bad baroh ki jait jingshai jong ki” u la bynrap.
“La pan ruh ïa ka jingïatreilang na baroh ki Dorbar Shnong, ki paidbah bad ki trai madan ïalehkai futsal na ka bynta ban pynlong ïa ka Blackout kaba jop.
Ka Blackout kan neh ar minit bad kan kut ha ka por 7:02 baje da kaba pynsawa ïa ka All-Clear Signal lyngba ka Siren jong ka Civil Defence” la ong u Mukhim.
U la bynrap ruh ba kum kine ki Mock Drill yn pynlong man ka por.
Kum shi bynta jong ka jingpynkhreh ban iada iaka Ri, bad ïada bad ïada ïa ki jingim jong ki riew paidbah ha ka por ba don ki jingïakynad bad ki thma, yn pynlong ïa ka Civil Defence Mock Drill halor ka Air Raid arsien man la u snem.
