Ai jingmut ka KSU da 20 tylli ki mat ban pynjanai ia ka rukom shakri ka MPSC

Wat thung dkhot MPSC da ki briew ba iadei bad ki riewsain pyrthei

Shillong Nailar 23: Ka Khasi Students Union (KSU) kala ai jingmut da ki 20 tylli ki mat ban pynbha bad pynjanai ia ka rukom treikam jong ka Meghalaya Public Service Commission (MPSC).

Haba aiti iaka dorkhas ha u Myntri Rangbah ka jylla u Conrad K Sangma ha ka nsgi Palei, ka KSU kala ong, “(Ngi) kyntu da kaba sngewrit ba ia kine ki jingai jingmut ki jong ngi na ka seng ban iatai sani bha ha ka dorbar ban wan”.

Ki 20 tylli ki mat ban pynkylla iaka Commission ki kynthup ia ka :
1. Ban thung Chairman bad ki Dkhot jong ka Commission da ki briew kiba biang, ki bym don jingiadei bad ka kam sain pyrthei.
2. Ka jingpynbna manla u snem ia ki jingdon jingem kiba kynthup ia u Chairman, ki Dkhot bad baroh ki nongtrei jong ka Commission.
3. Ka jingthaw ia ka tnad Vigilance and Anti-Corruption Directorate.
4. Ki nongaplai kam ki dei ban long ki nongshong shnong jong ka jylla Meghalaya bad ki dei ban nang ia ka ktien Khasi ne Garo na ka bynta kano kano ka kam kaba ki aplai ha ka MPSC.
5. Kadei ban don ka Combined Competitive Examinations ha ki kam kaba don ia kajuh ka jingai tulop bad ka kyrdan.
6. Ia ka eksamin MCS/MPS bad kiwei kiwei ki kam dei ban pynlong manla u snem.
7. Kadei ban don iaka almanac ne ka calendar manla u snem kynthup ia ki tarik ba kongsan na ka bynta ban pynlong ia ki eksamin da ka Commission.
8. Ka jingpyntip paidbah ia ki marks ba la ioh da ki kyrtong ha kino kino ki eksamin, kiwei kiwei ki Test bad ka Personal Interview ia kano kano ka kam ba la pynlong da ka Commission.
9. Ym dei ban don ka jingpynkylla ia ki Roll Number jong ki kyrtong hapdeng jongka jingpynrung kam.
10. Ym dei ban pynkylla ia ka rukom thungkam shisien ba la sdang ia ka kam.
11. Dei ban ai ia ka Carbon Copy jong ka OMR Sheet sha ki kyrtong kiba ialeh iaka eksamin.
12. Ka jingpyllait ia Answer Key hadien ba la dep pynlong iaka eksamin bad dei ban aida ka por kaba biang ban ioh tuklar halor ka Answer Key.
13. Ka jingthung kam dei ban pyndep hapoh 6 bnai naduh ka sngi ba la pynbna paidbah.
14. Dei ban pynduh noh ia ka “personal interview” na ka bynta ka Kyrdan B, C bad D.
15. Dei ban leh ia ka Personal Interview hapoh Camera na ka bynta ka Kyrdan A.
16. Dei ban pynbna paidbah ia ka kaiphod shisnem jong ka Commission.
17. Ki kot jingkylli kidei ban long kiba la buhrieh bha (Confidential) khnang ba kan ym don ka jinglait tuh.
18. Ban thaw iaka Creation of Grievances Cell ha ka Commission khnang ba yn lah ban ai ia ka jingujor.
19. Ka Separate Cadre ia ka jylla Meghalaya bad
20. Ka jingleh ia ki Test da ki kompiwtor na ka bynta ka lawei.

“Ka Union kala shimkhia halor kitei ki 20 tylli ki mat ha ka jingai jingmut haka taiew kaba la dep bad ka KSU kala lap ruh ia kiwei ki kam buhrieh hapoh jong ka Commission ia kaba donkam ban tuklar kyrkieh. Kum kitei ki jingbakla kin iai bteng ban jia ha ka Commisison lada ym lah ban wanrah ia ki jingpynkylla haka dur jong ka ain kiban treikam mardor” kala pynpaw bad ka bynrap baka seng ka dawa na ka sorkar ba kadei ban pynkylla noh ia ki Regulation jong ka Commission bad ban wanrah iaka jingryntih ha ka jingthep kam ia ki bad kiwei pat ki jingkylla kiba thymmai kiba lah ban kyntiew iaka Commission.

Ka Union kala pynpaw ba kala peitngor ba palat 50 snem naduh ba kane ka Commission ka la mih, ym shym la don kano kano ka jingkylla ne jingpynkylla ia ki kydon treikam ha ki kyndon jong ka Regulation 1972 kaban iahap bad kane ka juk kaba mynta bad kam shym la don satia, ka Recruitment Rules ne Examinations rules ban wanrah ia ka jingtreikam ryntih ha ka rukom thungkam ban pynlong iaka jingpynrungkam kaba long kaba hok bad kaba khuid haka jingpyniaid ka Commission.

La pynpaw ruh haka dorkhas ba ka KSU manla ka por kala pynsngew halor ki mat kiba iadei bad ka Commission shaka sorkar jylla bad ha ki taiew bala dep la pynlong iaka jingiakhih ban pyrshah ia ki kam buittuh kiba la pynlong da ka Commission bad ka jingthungkam kadei ban long kaba shai halor ka kyrdan MCS, MPS, LDA bad kiwei pat ki kyrdan.

“Lyngba kine ki jingpyrshang ba la leh da ka Seng ha kine ki taiew ba la dep, ka KSU ka dang sei ïa ki katto katne kiwei pat ki buit treikam kiba dum hapoh jong ka Commission lyngba ka kyndon ain bad lada kitei ki jingjia kin dang ïai bteng, lada ïa ki jingpynkylla lyngba ki kyndon aiñ ym shym la pyntreikam mardor,” kala ong haba bynrap ba ka Synjuk ka dawa ba ka Sorkar ka dei ban pynkylla ïa ki kyndon jong ka Commission bad ban wanrah ïa ka uniform. Ki kyndon thungkam bad eksamin bad kiwei kiwei ki jingkylli kiba donkam kiba kyntiew ia ka Komishon.