Shillong, Nailar 23 : U Lamphang ka Iingdorbar thaw ain Thomas A Sangma ula pyntip hynne ka sngi Thohdieng ba u dang ap ia u Bah Ronnie V Lyngdoh ban aiti ia ka shithi iehnohkam kum u Nongialam ka Liang Pyrshah (LO) hashuwa ba un shim rai ban pynduh noh ia ka jingithuh.
Haba iakren bad ki nongthoh khubor hadien ka Dorbar Synrai, u Lamphang ula ong “Nga ngeit ba baroh ki iatip ba u LO ba mynta ula sah marwei ha ka Iingdorbar. Kumta, ka Ophis u Lamphang kan hap ban pynduh noh ia ka jingithuh ia u kum u Nongialam ka Liang Pyrshah”.
Haba kylli la ka shuki LO kan leit noh sha ka TMC kaba don 5 ngut ki MLA, u Thomas ula ong “Ngam pat lah ong ia kane namar ym pat don ba wan na ka Ling Pyrshah ban buh ia ka jingkyrpad. Nga lah ban iaid hala ka jong ka por ban shim rai bad shong bishar bha ia ka kam. Ngam lah ban shim rai khlem ka jingai jingthoh”.
Halor ka jingiatreilang kum kawei ka kynhun ha Liang Pyrshah, u Lamphang ula ong ba ia mynta hi kam pat don satia ka jingiatreilang.
Lano ka Ophis u Lamphangkan pynmih ia ka jingpynbna bala pynduh ia ka jingithuh ia u Bah Ronnie kum u LO, ula ong “Nga dang ap ia une u LO ba mynta ba un aiti ia ka shithi iehnohkam khnang ba ngin lahban pynmih jingpynbna”.
Lah ban kdew hangne ba u Bah Ronniew MLA ka Congress na Mylliem uba bat ia ka shuki Nongialam ka Liang Pyrshah, ula sah marwei kum u dkhot ka Congress ha Iingdorbar hadien ba lai ngut ki MLA-Gabriel Wahlang, Dr Celestine Lyngdoh bad Charles Marngar, kila leit ban iasoh noh sha ka NPP.
