Ai jingmut ka Assembly Committee ban peitngor bha ia baroh ki Hostel Khynnah ha Jylla

Date:

Share post:

Hadien ka jingpyllait ia ki Khynnah na Rimpu Bagan

Shillong, Nailar 08: Ka Meghalaya Assembly Committee on Women Empowerment hynne ka sngi nyngkong, kala ai jingmut halor ka jingdonkam ban don ka jingpeitngor kaba pyrkhing bha ia baroh ki Hostel jong ki Khynnah kiba don hapoh ka Jylla.

Kane kala mih hadien ka jingioh pyllait ia ki 6 ngut ki khynnah na Rimpu Bagan, ka jaka ba ki Pulit ka West Garo Hills kila kyndang ia ka kam khaii met ha u bnai bala lah, kaba lam ruh sha ka jingkem ia u MDC ka BJP na Tura Bernard N Marak lem bad 73 ngut kiwei pat.

Hadien ba pyniaid ia ka jingialang bad ki Heh Ophisar ka Tnad Social Welfare, I Chairperson ka Committee Kong Ampareen Lyngdoh ila iathuh ha ki nongthoh khubor ba baroh ki Hostel ba la buh ia ki Khynnah Rit ka dei ban ioh ia ki kynja jingbit na ka Sorkar bad ba dei ruh ban don ka jingpeitngor ba man ka por ha kaban pynthikna ba ki Khynnah kin nym ngat ha kino kino ki jingjia kumba la jia ha West Garo Hills.

“Baroh ki Hostel kiba ai jaka sah ia ki Khynnah kiba hapoh ka 18 snem ki dei ban don hapdeng ka jingpeitngor bha. Ka dei ban don ka jingleit jngoh ia kine ki hostel, ka jinghap register bad kiwei kiwei khnang ba ngin nym ap shuh ia kum kine ki jingjia ka West Garo Hills ba pynkhein ia ka hok jong ki” ong I Kong Ampareen iba dei ruh u MLA ka East Shillong.

“Nga sngew baka Sorkar Meghalaya mynta ka dei ban wanrah da ka kyndon bad hap ban sdang ia ka jingpeitngor ia kane ka bynta namar ngi la iohi ia ki jingbym biang ha baroh ki liang” ila ong haba ban jur “Ngin shim ia ka jinghikai na kaei kaba la jia bad ngi dei ban pynthikna ba ngi ai ka jingshngain ia ki Khynnah kiba leit sah ha kine ki hostel”.

Napdeng ki hynriew ngut ki Khynnah ba ioh pyllait da ki Pulit na Rimpu Bagan, I Kong Ampareen I ong b aka Tnad Social Welfare kan sa shimti noh ia ki bad ban pynthikna ba kine ki Khynnah kin ioh ia ka lad ban sah noh ha ki Childrens Home. I ong ba iwei na kine ki Khynnah I dei iba la iatakhuh bad ka ain.

Haba kyntait ban batai bniah ia kane ka jingjia ha Rimpu Bagan, I kong Ampareen ila ong ba ka Committee ka kwah ban pynthikna ba ka hok jong kine ki Khynnah ka ioh ia ka jingiada bad ba kin ioh ruh ia ka lad ba kin leit phai biang sha ka jingim kumba ju long baroh shikatta bad ban leit biang sha ki skul.

Ka Committee kala pan ruh ia ka kaiphod halor jong ki Khun ki Longkmie kiba shah pyniap dang shen ha Ri-lum Jaintia.

I Kong Ampareen ila kren ia ka case jong iwei I Longkmie, iba la ieh noh ia 10 ngut ki Khun na ka jingshah pyniap ha ri-lum Jaintia bad pyntip ba ka Tnad Social Welfare kala kular ia ka Committee ba ki Khun jong ine I Longkmie ba 2 haduh 14 snem yn sa buh noh ha ki Institutional Homes ha East Jaintia Hills District.

“Ngi kwah ban pynthikna ba kine ki Khynnah kin ioh khlem sangeh ia ka jingiarap na ka Sorkar Meghalaya tad haduh ba kin da kynjoh ia ka 18 snem ka rta. U don uwei u Khynnah uba la dap 18 snem bad ia une un sa ai jinghikai noh ha ka kam khap sniuh” ila ong.

Nalor kane, I kong Ampreen ila pyntip ba ki arngut ki Khun jong I Kong G Bareh ba shah pyniap lang ha East Jaintia Hills, iba la 8 snem bad 12 snem ka rta yn sa ri sa sumar noh da I Kmieieid ba 62 snem ka rta I Kong Meera Bareh.

“Ngi la bthah ia ka Tnad Social Welfare ban pynthikna ba I Meiieid Meera Bareh in ioh ia ki jingiarap khnang ban pynthikna ba kine ki Khun ksiew jong I kin nym mad ia ka jingjynjar hadien ka jingkhlad noh i Kmie” ila ong.

Share post:

spot_img

Popular

More like this
Related

Jur ka jinghap thah ha Sikkim, sahkut palat 500 ngut ki nongshang suwari

Gangtok, Rymphang 21: Namar ka jingjur ka jinghap thah,...

Dawa ki nongrep ia u DC ban kem naphang ia kiba thang lum ha WKH

Nongstoin, Rymphang 21 :Ka seng ki nongrep Hills Farmers...

Kurup ki BSF ia ki dawai Phensedyl bad ka shini ba khappud Bangladesh

Shillong, Rymphang 21: Ki shipai BSF ha ka sngi...

Plie u Dr Mansukh ia ka workshop ka koit ka khiah ki Jylla NE ha Shillong

Shillong, Rymphang 21: U Myntri ka Sorkar Pdeng ba...