Shillong, Nailar 08: Ka Meghalaya Assembly Committee on Women Empowerment hynne ka sngi nyngkong, kala bthah ia ka Tnad Labour ba kan thaw noh ia ka Plan kumno ba kan ai jingiada ia ka hok bad ka bha ka miat jong ki Nongtrei kiba im bylla sngi kat kaba ioh ka kam (Unorganised sector) hapoh ka Jylla.
Hadien ba pyniaid ia ka jingialang, I Chairperson ka Committee Kong Ampareen Lyngdoh ila iathuh ha ki nongthoh khubor ba la aipor shibnai ia ka Tnad Labour ba kan wanrah ia ki jingkhein jingdiah sha ka Committee halor ka jingdon ki nongtrei kiba bylla sngi ha ki kam bapher bapher ha Jylla.
“Ngi la bthah ia i Labour Commissioner ban wanrah noh mardor ia ka Plan bad ila pyntip ba ila pyntip ruh ia ki katto katne ki plan. Ngi la ai katto katne por ia ka Tnad bad hapoh ka shibnai naduh mynta ka sngi, ngin sa sngewthuh bha ia kane ka kam” ila ong.
I Kong Ampareen iba dei u MLA ka East Shillong,ila ong ba la bthah ia ka Tnad Labour ban wad ia kaei ka lynti kaba biang eh ha kaban iada ia ka hok bad ka bha ka miat jong ki Nongtrei bylla iingbriew, ki kynthei kiba leit bylla sngi ha ki iingbriew bad ha kiwei kiwei ki kam Contract.
“La pyntip sha ngi ba haba ki kynthei ki armet, kim ju ioh shuti kha khun satia. Ngi hap ban pynthikna ba ka Sorkar Jylla kan buh hakhmat eh mynta ia kane ka kam” ila ong.
Ka Committee kala ioh iakren ruh bad ki Agency bapher bapher kiba ai kam ha ki unorganised sector hapoh ka Jylla ba kynthup ia ka jingai kam pahara ia ki shipai bala shongthait.
Ka Committee ka kwah ruh ban tip la baroh ki Nongtrei ki ioh ia ka hok ban ioh shuti shisngi ha ka shitaiew, ka kam kaba ki trei bad kiwei kiwei.
“Ngi hap ruh ban pynthikna ba baroh ki Nongtrei kin ioh ia ka jingsiew kat kum ka minimum wage act jong ka Sorkar India. Ngi kwah ban pynthikna ba baroh ki nongtrei kiba trei ha ki dukan bad kiwei kiwei ki jaka ruh kin ioh ia ka hok kum ki nongtrei” ong I kong Ampareen.
