Nongpoh, Nailar 08: Ka Seng Samla Border Area (SSBA), Raid Nongtung, hynne ka sngi nyngkong, kala phah da ka dorkhas sha u Deputy Commissioner ka Ri-Bhoi District, ba kyrpad ba un theh lem ia ki kam pynroi jong ka Sorkar Meghalaya sha ki shnong khappud jong ka Raid Nongtung.
Ia kane ka dorkhas la aiti ha u Additional Deputy Commissioner ka District Bah MB Tongper hadien ka jingbym iakynduh ia u Deputy Commissioner uba la mih na Ophis ban pyndep ia kiwei pat ki kam jong ka sorkar hapoh ka District.
Kat kum kane ka dorkhas, ka SSBA kala kyrpad ia u DC ba un tuklar lem ha kaban shna pynbha noh ia ka surok bala pei la jot na Mawlasnai sha Jatalong kaba don kumba 2 Km ka jingjngai, kaba la tei lyngba ka skhim RIDF naduh u snem 2015-2016.
Ka SSBA kala kyrpad ruh ia une u Khliehduh ka District ba un tuklar ha kaban wanrah noh ia ki kor pynmih bording naka sngi ne ka Solar Light System ha ka shnong Umsohlaper kaba don kumba 52 tylli ki Longiing. Ka pyntip ba haduh mynta, ka Sorkar Meghalaya kam pat lah satia ban wanrah ia ka bording elektrik ha kane ka shnong.
Ki la pyntip ruh ba ka solar Light System ba la wan ai da ka sorkar Meghalaya ha ka shnong Sabuda naduh u snem 2017-2018 ka la sniew bad la donkam ban ioh thymmai noh bad kum ka seng ka la kyrpad jur ïa u Deputy Commissioner ka Ri Bhoi ba un shim khia lem ïa kine ki jingdonkam ki paidbah ha katei ka thaiñ khappud.
Ka Seng Samla kala buh ruh ia ka jingkyrpad hakhmat u Deputy Commissioner ba un shimkhia ban phah pynsangeh ïa ka jingwan ai bording ilektrik ka sorkar Assam naduh ka 13 tarik u Naitung 2022 ha kitei ki shnong khappud, ba kum ki shnong Khasi ki pyrshah bad ki kwah ba ïa kane ka jingsam bording dei ban wan na ka sorkar Meghalaya.
