Shillong, Nohprah 10: U MLA ka South Shillong Constituency u Bah Sanbor Shullai uba long ruh u Chairman ka Monitoring Cum Implementation Committee ka 19th South Shillong Constituency, ha ka Sngi Saitjaiñ ula pynlong ia ka Pre Christmas bad New Year Get-Together ha kaba ula ai jingiarap T. 3,50,000 sha ki 14 tylli ki Balang Khristan na ka bynta ban ioh pynkhreh iaka jingrakhe iaka Christmas.
U Bah Sanbor ula ai ia katei ka song tyngka sha ki 14 tylli ki Church Committee kiba kynthup ia ki Balang Khristan ki Khasi, Jaintia, Garo bad ki bym dei riewlum kiba hap hapoh jong ka South Shillong Constituency, lyngba ka Discretionary Grant jong u snem 2023, khnang ba kin ioh ban pynkhreh ia ka Christmas & New Year ha ki Balang ki jongki bad la ki riewngeit.
Kum u MLA u Bah Sanbor ula kyntu ia ki nongialam Balang ba kin ialeh ban pyndonbynta lang ia ki heprit khamtam eh ia kito kiba wan na ki longiing baduk ba kin rakhe ia ka Christmas & New Year.
U Bah Sanbor ula pynbna ba yn pynlong ia kane ka jingrakhe ryngkat bad ka jingsam ia ka jingiarap man la u snem bad baroh ki Balang Khristan kiba don hapoh ka Constituency.
Hadien ba la dep ban sam ia katei ka jingiarap la pynlong iaka jingot ia u cake christmas bad ka jingdih sha bad la pynkut ia katei ka prokram da ka jingbuh jingduwai u Pastor Rev Sadhu Sundar Singh jongka North India Christian Church.
