Shillong, Nohprah 10: Ka jingiaid lynti ba khlem shah rem haduh 8 sien kynthih kala kut noh hadien baka Shillong Lajong kala shah pynliem da 3-0 haka Aizawl FC haka jingiakhun I-League kaba la long ha madan SSA Polo Shillong.
Ka Aizawl FC kala pyni iala ka jingtbit naduh ba sdang ka jingiakhun bad kala ioh pynkhih jar nyngkong da u Lalrinzuala haka 4 minit.
Hadien kane u R. Ramdinthara ula ioh ban thep iaka goal kaba ar naka bynta ka Aizawl haka 17 minit kaba la pynsngap jar iaki hajar ngut ki nongkyrshan ka Shillong Lajong.
Watla ka Lajong kala pyrshang ban pynphai kylla hynrei haduh 3 sien la shah khanglad ha u dieng goal.
Naka liang ka Aizawl kala pynthikna ban ioh jingjop lyngba ka goal kaba lai da u Zoherliana haka 57 minit.
Lyngba kane ka jingjop, ka Aizawl ka don mynta haka kyrdan ba ar daka jingioh 17 points katba ka Shillong Lajong ka don haka kyrdan ba saw daka ba ioh 16 points naki 9 sien ki jingiakhun haka I-League 2023.
Ka Shillong Lajong kan iakynduh sa bad ka Real Kashmir haka 16 tarik mynta u bnai.
